મુંબઈ : કહેવાય છે કે સેલિબ્રિટીઝ માટે તેમના ફેન્સ જ બધું હોય છે, અને આ વાત સાઉથના સુપરસ્ટાર સૂર્યાએ ફરી એકવાર સાબિત કરી દીધી છે. સોશિયલ મીડિયા પર અત્યારે એક લગ્નનો વીડિયો જોરદાર ટ્રેન્ડ થઈ રહ્યો છે, જેમાં સૂર્યા કોઈ પૂર્વ સૂચના વગર લગ્ન મંડપમાં પ્રવેશતા જોવા મળે છે. વરરાજા અરવિંદે તેની દુલ્હન કાજલ માટે આ ખાસ સરપ્રાઈઝ પ્લાન કર્યું હતું, જે સફળ થતા જ દુલ્હનની આંખોમાં ખુશીના આંસુ આવી ગયા હતા.

દુલ્હનની પ્રતિક્રિયાએ જીત્યા દિલ

વાયરલ વીડિયોમાં જોઈ શકાય છે કે સૂર્યા એકદમ સાદગીભર્યા પોશાકમાં અને સનગ્લાસ પહેરીને લગ્ન હોલમાં પ્રવેશે છે. તેમને જોતા જ દુલ્હન કાજલ એટલી આશ્ચર્યચકિત થઈ જાય છે કે તે પોતાનું મોં ઢાંકી દે છે અને તેને પોતાની આંખો પર વિશ્વાસ નથી આવતો. ત્યારબાદ તે આગળ વધીને સૂર્યાનું સ્વાગત કરે છે અને તેમની સાથે હાથ મિલાવે છે. સૂર્યાએ માત્ર સ્ટેજ પર જઈને દંપતીને આશીર્વાદ જ નથી આપ્યા, પરંતુ ખૂબ જ વિનમ્રતાથી મહેમાનો સાથે વાતચીત પણ કરી હતી.

ફેન્સમાં ઈર્ષ્યા અને ખુશીનો માહોલ

લગ્નમાં સૂર્યાની હાજરીથી સોશિયલ મીડિયા પર કોમેન્ટ્સનો વરસાદ થઈ રહ્યો છે. એક યૂઝરે લખ્યું, "લગ્નના દિવસે આનાથી મોટું સરપ્રાઈઝ બીજું શું હોઈ શકે? અમને કાજલની ઈર્ષ્યા થઈ રહી છે!" જ્યારે બીજા એક ફેને લખ્યું, "સૂર્યા ખરેખર જમીન સાથે જોડાયેલા વ્યક્તિ છે." દુલ્હને પણ સોશિયલ મીડિયા પર પોસ્ટ શેર કરીને લખ્યું હતું કે, "તમારા જેવા વ્યક્તિત્વને રૂબરૂ મળવું એ મારા માટે જીવનનો સૌથી શ્રેષ્ઠ અનુભવ છે."

સૂર્યાનું વર્કફ્રન્ટ

કામના મોરચે વાત કરીએ તો, સૂર્યા હાલમાં તેના આગામી પ્રોજેક્ટ ‘કરુપ્પુ’ પર કામ કરી રહ્યો છે, જેમાં તેની સાથે આરજે બાલાજી પણ જોવા મળશે. આ વર્ષે રિલીઝ થયેલી ફિલ્મ ‘રેટ્રો’ ભલે બોક્સ ઓફિસ પર ખાસ કમાલ ના કરી શકી હોય, પરંતુ સૂર્યાની લોકપ્રિયતા અને ફેન ફોલોઈંગમાં કોઈ જ ઘટાડો થયો નથી, જે આ વાયરલ વીડિયો પરથી સ્પષ્ટ દેખાય છે.