ઓકલેન્ડ:  જ્યારે ભારત હજી 2025ના છેલ્લા કલાકોમાં સૂર્યાસ્તની મજા માણી રહ્યું છે, ત્યારે ન્યૂઝીલેન્ડના ઓકલેન્ડ શહેરે વર્ષ 2026ના સ્વાગતમાં ઇતિહાસ રચી દીધો છે. ઓકલેન્ડના સુપ્રસિદ્ધ 'સ્કાય ટાવર' પરથી છોડવામાં આવેલા હજારો ફટાકડાઓએ અંધકારભર્યા આકાશને સોનેરી અને રંગબેરંગી રોશનીથી ભરી દીધું હતું. આ ભવ્ય નજારો જોવા માટે લાખો લોકો રસ્તાઓ પર ઉતરી આવ્યા હતા અને 'હેપ્પી ન્યૂ યર'ના નાદથી સમગ્ર વાતાવરણ ગુંજી ઉઠ્યું હતું. સમય ઝોનના તફાવતને કારણે ન્યૂઝીલેન્ડ એવા દેશોમાં સામેલ છે જ્યાં વર્ષની શરૂઆત સૌથી વહેલી થાય છે, જેણે હવે વિશ્વભરમાં ઉજવણીની લહેર દોડાવી દીધી છે.

વિશ્વમાં નવા વર્ષનું સૌથી પહેલું સ્વાગત પેસિફિક મહાસાગરના કિરીટીમાટી ટાપુઓ પર કરવામાં આવ્યું હતું, જે ભારત કરતા લગભગ સાડા સાત કલાક આગળ છે. ન્યૂઝીલેન્ડ બાદ હવે ઓસ્ટ્રેલિયાના સિડની હાર્બર બ્રિજ અને ઓપેરા હાઉસ ખાતે અદભૂત શોની તૈયારીઓ પૂર્ણ થઈ ગઈ છે. જેમ જેમ પૃથ્વી પોતાની ધરી પર ફરશે, તેમ તેમ ઉજવણીનો આ સિલસિલો એશિયાથી યુરોપ અને છેલ્લે અમેરિકા સુધી પહોંચશે. ન્યૂયોર્કનું ટાઇમ્સ સ્ક્વેર હોય કે બ્રાઝિલનો કોપાકાબાના બીચ, દરેક સ્થળે લાખો લોકો આ ઐતિહાસિક પળના સાક્ષી બનવા માટે એકઠા થયા છે.

રસપ્રદ વાત એ છે કે, વિશ્વમાં નવા વર્ષની ઉજવણીમાં લગભગ 25 કલાકનો તફાવત જોવા મળે છે. કિરીબાતીથી શરૂ થયેલી આ સફર અંતે અમેરિકન સમોઆ અને ન્યુ ટાપુ પર પૂર્ણ થશે, જ્યાં વિશ્વનો છેલ્લો 'ન્યૂ યર શો' જોવા મળશે. ભારતમાં પણ મધ્યરાત્રિએ ભગવાન દ્વારકાધીશ અને સોમનાથ દાદાના સાનિધ્યમાં તેમજ મેટ્રો શહેરોમાં મોટા પાયે ઉજવણીનું આયોજન છે. અત્યારે સોશિયલ મીડિયા પર ન્યૂઝીલેન્ડના આતશબાજીના વીડિયો વાયરલ થઈ રહ્યા છે, જે જોઈને આખી દુનિયા નવા વર્ષના ઉમંગમાં રંગાઈ ગઈ છે.