નવી દિલ્હી: બેંક લોન કૌભાંડ મામલે એન્ફોર્સમેન્ટ ડિરેક્ટોરેટ એટલે કે ઈડી દ્વારા એક મોટી કાર્યવાહી કરવામાં આવી છે. 'રીડ એન્ડ ટેલર' જેવી જાણીતી બ્રાન્ડ સાથે સંકળાયેલી કંપની એસ. કુમાર્સ નેશનવાઈડ લિમિટેડના પ્રમોટર નિતિન કાસલીવાલની લંડન સ્થિત એક હાઈ-પ્રોફાઈલ સંપત્તિને ઈડીએ ટાંચમાં લીધી છે. આ સંપત્તિ બ્રિટનના રાજવી પરિવારના નિવાસસ્થાન બકિંગહામ પેલેસની નજીક એક પ્રાઈમ લોકેશન પર આવેલી છે, જેની કિંમત કરોડોમાં હોવાનું મનાય છે.
પ્રાપ્ત વિગતો અનુસાર, નિતિન કાસલીવાલ પર આશરે ૧૪૦૦ કરોડ રૂપિયાથી વધુના બેંક લોન કૌભાંડ અને મની લોન્ડરિંગનો આરોપ છે. તપાસમાં બહાર આવ્યું છે કે લંડનમાં આવેલી આ સંપત્તિ નિતિન કાસલીવાલ અને તેમના પરિવારના સભ્યોની 'બેનિફિશિયલ ઓનરશિપ' (લાભદાયી માલિકી) હેઠળ રાખવામાં આવી હતી. 
આઈડીબીઆઈ બેંક અને અન્ય નાણાકીય સંસ્થાઓ સાથે થયેલી છેતરપિંડીના કેસમાં પ્રિવેન્શન ઓફ મની લોન્ડરિંગ એક્ટ (પીએમએલએ) હેઠળ આ ટાંચની કાર્યવાહી કરવામાં આવી છે. આ પહેલાં પણ ઈડી દ્વારા કાસલીવાલની ભારત સ્થિત કરોડોની સંપત્તિઓ જપ્ત કરવામાં આવી હતી. 
આ કાર્યવાહી આર્થિક ભગોડાઓ અને બેંક ડિફોલ્ટરો સામે ઈડીની કડક નીતિનો વધુ એક પુરાવો છે.