પટના:  બિહારના રાજકારણમાં દાયકાઓથી પ્રભુત્વ ધરાવતા મુખ્યમંત્રી નીતિશ કુમારે વર્ષ ૨૦૨૫ના અંતિમ દિવસે પોતાની સંપત્તિનો હિસાબ જનતા સમક્ષ રજૂ કર્યો છે. દર વર્ષની પરંપરા મુજબ જાહેર કરાયેલી આ યાદીમાં સૌથી આશ્ચર્યજનક બાબત એ છે કે, નીતિશ કુમાર પાસે બિહારની રાજધાની પટનામાં પોતાનું કોઈ અંગત મકાન કે ખેતીલાયક જમીન નથી. તેમની કુલ સંપત્તિ આશરે ₹૧.૬૫ કરોડ આંકવામાં આવી છે, જેમાંથી મોટો હિસ્સો દિલ્હીના દ્વારકામાં આવેલા તેમના એકમાત્ર ફ્લેટનો છે. રસપ્રદ વાત એ છે કે, તેમની પાસે રોકડ સ્વરૂપે માત્ર ₹૨૦,૫૫૨ છે, જે એક સામાન્ય નાગરિકની બચત જેવી જ લાગે છે.

નીતિશ કુમારની જંગમ સંપત્તિમાં તેમની ગૌશાળા આકર્ષણનું કેન્દ્ર બની છે. મુખ્યમંત્રીને પશુપાલનનો શોખ હોય તેમ તેમની પાસે ૧૦ ગાયો અને ૧૩ વાછરડા છે, જેની કિંમત ₹૧.૪૫ લાખ દર્શાવવામાં આવી છે. આ ઉપરાંત, તેઓ ૨૦૧૫ મોડેલની ફોર્ડ ઇકોસ્પોર્ટ કાર ધરાવે છે, જેની વર્તમાન કિંમત ₹૧૧.૩૨ લાખ ગણવામાં આવી છે. મોંઘા ઘરેણાંના નામે તેમની પાસે માત્ર બે સોનાની વીંટી અને એક ચાંદીની વીંટી છે. ઘરવપરાશની ચીજોમાં તેમની પાસે ટ્રેડમિલ, એર કંડિશનર અને વોશિંગ મશીન જેવી પાયાની સુવિધાઓ છે, જે તેમની સાદગીભરી જીવનશૈલીનો પરિચય આપે છે.

મુખ્યમંત્રીના જાહેર કરાયેલા સોગંદનામા મુજબ, દિલ્હીના દ્વારકા સેક્ટર-૫ માં આવેલો ૧,૦૦૦ ચોરસ ફૂટનો ફ્લેટ તેમની સૌથી કિંમતી મિલકત છે, જે તેમણે ૨૦૦૪માં ₹૧૩.૭૮ લાખમાં ખરીદ્યો હતો અને આજે તેની બજાર કિંમત ₹૧.૪૮ કરોડ સુધી પહોંચી છે. બેંક બેલેન્સની વાત કરીએ તો, તેમના વિવિધ ત્રણ ખાતાઓમાં કુલ ₹૬૩,૭૬૬ જમા છે. સૌથી મહત્વની વાત એ છે કે, મુખ્યમંત્રી પર કોઈ પણ પ્રકારનું દેવું કે સરકારી લેણું બાકી નથી. આ વિગતો દર્શાવે છે કે નીતિશ કુમારે તેમની 'મિસ્ટર ક્લીન' ની છબી જાળવી રાખી છે.