નવી દિલ્હી : દેશની સર્વોચ્ચ અદાલત સામાન્ય જનતા માટે ૨૪ કલાક સુલભ બને તે દિશામાં ભારતના મુખ્ય ન્યાયાધીશ (સીજેઆઈ) સૂર્યકાંતે એક ક્રાંતિકારી નિર્ણય લીધો છે. તેમણે જાહેરાત કરી છે કે હવે ધરપકડ અથવા કાયદાકીય કટોકટીનો સામનો કરી રહેલા કોઈપણ વ્યક્તિ મધ્યરાત્રિએ પણ સુપ્રીમ કોર્ટનો સંપર્ક કરી શકશે. ન્યાયમૂર્તિ સૂર્યકાંતે જણાવ્યું હતું કે તેમનું વિઝન અદાલતોને સાચા અર્થમાં 'લોકોની અદાલત' બનાવવાનું છે, જે કામકાજના કલાકો પછી પણ મૌલિક અધિકારોના રક્ષણ માટે તૈયાર રહે. આ નિર્ણયથી સામાન્ય નાગરિકોને ન્યાય મેળવવામાં વધુ સરળતા રહેશે.