નવી દિલ્હી : દિલ્હીના પોશ વિસ્તાર ગણાતા સર્વપ્રિય વિહાર અને વેસ્ટ એન્ડ ગ્રીન ફાર્મ્સમાં EDએ હાથ ધરેલા સર્ચ ઓપરેશનમાં ચોંકાવનારા ખુલાસા થયા છે. ગેંગસ્ટર ઈન્દરજીત સિંહ યાદવ અને તેના સહયોગીઓના પરિસરમાંથી તપાસનીશ એજન્સીને કુલ ₹6.37 કરોડની બિનહિસાબી રોકડ મળી આવી છે. સૌથી વધુ ચોંકાવનારી બાબત એ છે કે, એક સામાન્ય દેખાતી સુટકેસમાંથી ₹16.50 કરોડની કિંમતના સોના અને હીરાના દાગીના મળી આવ્યા હતા. આ મની લોન્ડરિંગ કેસમાં ગેંગસ્ટરના સાથી અમન કુમાર અને સુનીલ ગુપ્તા વચ્ચેના આર્થિક વ્યવહારોની કડીઓ પણ મળી છે, જે દર્શાવે છે કે કઈ રીતે ગુનાખોરી દ્વારા મેળવેલા નાણાંને લોન્ડર કરવાનો પ્રયાસ કરવામાં આવતો હતો.

તપાસ એજન્સીના જણાવ્યા અનુસાર, આ ગેંગ સામે ઉત્તર પ્રદેશ અને હરિયાણામાં અગાઉથી જ ૧૫થી વધુ એફઆઈઆર નોંધાયેલી છે. આ ગેંગ મુખ્યત્વે લોન વસૂલાતના બહાને વેપારીઓને બ્લેકમેલ કરી તેમની પાસેથી મોટી રકમની ખંડણી ઉઘરાવતી હતી. દરોડા દરમિયાન ₹35 કરોડથી વધુની સ્થાવર મિલકતોના દસ્તાવેજો પણ જપ્ત કરવામાં આવ્યા છે, જે સૂચવે છે કે આ ગેંગસ્ટરે ડર અને ધાકધમકીથી આખું આર્થિક સામ્રાજ્ય ઊભું કર્યું હતું. સુનીલ ગુપ્તાના ફાર્મહાઉસ પર ૩૦ ડિસેમ્બર ૨૦૨૫થી શરૂ થયેલી તપાસ હજુ પણ ચાલુ છે, કારણ કે એજન્સીને શંકા છે કે હજુ પણ મોટી માત્રામાં રોકડ ગુપ્ત સ્થળોએ છુપાવેલી હોઈ શકે છે.

આ મેગા ઓપરેશનથી અંડરવર્લ્ડ અને મની લોન્ડરિંગના નેટવર્કને મોટો ઝટકો લાગ્યો છે. ED હવે આ કેસમાં કયા રાજકીય કે વ્યાપારી લોકોના સંરક્ષણ હેઠળ આ રેકેટ ચાલતું હતું તેની ઉંડી તપાસ કરી રહી છે. પ્રાથમિક પૂછપરછમાં જાણવા મળ્યું છે કે અમન કુમાર દ્વારા જે રકમ ટ્રાન્સફર કરવામાં આવી હતી તેનો હેતુ એજન્સીની નજરમાંથી બચવાનો હતો. આગામી દિવસોમાં આ કેસમાં વધુ કેટલાક હાઈ-પ્રોફાઈલ નામો બહાર આવવાની શક્યતા છે, અને જપ્ત કરાયેલી મિલકતોની કિંમત ₹૧૦૦ કરોડને આંબી જાય તેવી સંભાવના સેવવામાં આવી રહી છે.