સિયોલ : નવા વર્ષના પ્રથમ દિવસે જ દક્ષિણ કોરિયાથી આર્થિક જગત માટે ખૂબ જ પ્રોત્સાહક સમાચાર સામે આવ્યા છે. વિશ્વના વેપાર માટે 'બેરોમીટર' ગણાતા આ દેશે ૨૦૨૫ના વર્ષમાં નિકાસના ક્ષેત્રે એક નવો સીમાચિહ્ન સ્થાપિત કર્યો છે. ગુરુવારે જાહેર કરાયેલા સત્તાવાર ડેટા મુજબ, દક્ષિણ કોરિયાની વાર્ષિક નિકાસ ઇતિહાસમાં પ્રથમ વખત $700 બિલિયન (આશરે ૫૮ લાખ કરોડ રૂપિયા) ના જંગી આંકડાને વટાવી ગઈ છે.
અર્થશાસ્ત્રીઓના અનુમાન ખોટા પડ્યા
પોલમાં અર્થશાસ્ત્રીઓએ ડિસેમ્બર મહિનામાં નિકાસમાં ૯% વધારાની આગાહી કરી હતી, પરંતુ દક્ષિણ કોરિયાએ આ તમામ ધારણાઓને પાછળ છોડી દીધી છે. ડિસેમ્બરમાં નિકાસ ૧૩.૪% વધીને $૬૯.૫૮ બિલિયન સુધી પહોંચી ગઈ છે. આ સતત સાતમો મહિનો છે જ્યારે કોરિયાની નિકાસમાં વૃદ્ધિ જોવા મળી છે.
ગ્લોબલ ટેક હબ તરીકેની મજબૂત પકડ
એશિયાની ચોથી સૌથી મોટી અર્થવ્યવસ્થાની આ સફળતા પાછળ સેમિકન્ડક્ટર્સ (ચીપ), કાર અને હાઈ-ટેક ઈલેક્ટ્રોનિક્સ વસ્તુઓની વૈશ્વિક માંગમાં થયેલો વધારો જવાબદાર માનવામાં આવે છે. સમગ્ર ૨૦૨૫ દરમિયાન કુલ નિકાસ ૩.૮% વધીને $૭૦૯.૭ બિલિયન પર પહોંચી છે. બીજી તરફ, ડિસેમ્બરમાં આયાતમાં પણ ૪.૬% નો વધારો નોંધાયો છે, જે $૫૭.૪૦ બિલિયન રહ્યો છે.
આગામી વર્ષ માટે સકારાત્મક સંકેતો
વૈશ્વિક બજારમાં મંદીની આશંકાઓ વચ્ચે દક્ષિણ કોરિયાનું આ પ્રદર્શન સાબિત કરે છે કે તેની ઉત્પાદન ક્ષમતા અને ટેકનોલોજીની માંગ હજુ પણ અત્યંત મજબૂત છે. આ આંકડાઓ દર્શાવે છે કે ૨૦૨૬માં પણ કોરિયા વૈશ્વિક વેપારમાં તેની અગ્રણી ભૂમિકા જાળવી રાખશે. નિકાસમાં આવેલો આ ઉછાળો કોરિયન કરન્સી 'વોન' અને સ્થાનિક શેરબજાર માટે પણ બૂસ્ટર ડોઝ સામાન સાબિત થઈ શકે છે.