કોલકાતા: પશ્ચિમ બંગાળના રાજકારણમાં આગામી વિધાનસભા ચૂંટણી માટે અત્યારથી જ ગરમાવો આવી ગયો છે. કેન્દ્રીય ગૃહમંત્રી અમિત શાહે કોલકાતામાં પક્ષના નેતાઓ અને કાર્યકરો સાથે શ્રેણીબદ્ધ બેઠકો યોજીને 'મિશન 2026'નું બ્યુગલ ફૂંક્યું છે. તેમણે સ્પષ્ટ કર્યું છે કે ભાજપ માત્ર ચૂંટણી લડવા માટે નહીં, પરંતુ રાજ્યની 294 બેઠકોમાંથી બે તૃતીયાંશ એટલે કે 200થી વધુ બેઠકો જીતીને ઐતિહાસિક પરિવર્તન લાવવા માટે મેદાનમાં ઉતરશે. આ લક્ષ્યને હાંસલ કરવા માટે શાહે 'ઘૂસણખોરી મુક્ત બંગાળ' અને 'સોનાર બાંગ્લા' સહિતના પાંચ મુખ્ય એજન્ડા નક્કી કર્યા છે, જે ભાજપના પ્રચારના મુખ્ય સ્તંભ રહેશે.

ઘૂસણખોરી અને સુરક્ષા: ભાજપનો સૌથી મોટો ચૂંટણી હથિયાર
અમિત શાહે પોતાના પ્રવાસ દરમિયાન ઘૂસણખોરીના મુદ્દાને સૌથી વધુ પ્રાધાન્ય આપ્યું છે. તેમણે કાર્યકરોને આદેશ આપ્યો છે કે તેઓ લોકોની વચ્ચે જઈને સમજાવે કે કેવી રીતે વર્તમાન સરકારની 'તુષ્ટિકરણની નીતિ' રાજ્યની સુરક્ષા માટે જોખમ ઊભું કરી રહી છે. શાહે વચન આપ્યું છે કે જો ભાજપ સત્તા પર આવશે, તો બંગાળની સરહદો સીલ કરવામાં આવશે અને એક પણ ઘૂસણખોરને રાજ્યમાં રહેવા દેવામાં આવશે નહીં. આ સાથે જ તેમણે 'વંદે માતરમ' અને 'જય શ્રી રામ'ના નારા દ્વારા સાંસ્કૃતિક રાષ્ટ્રવાદને ધાર આપવાની વ્યૂહરચના પણ ઘડી છે.

ભ્રષ્ટાચાર પર સીધો પ્રહાર અને સંગઠનમાં નવો પ્રાણ
ચૂંટણી જીતવા માટે શાહે ભ્રષ્ટાચારને મોટું શસ્ત્ર બનાવ્યું છે. તેમણે સૂચના આપી છે કે ભાજપના કાર્યકરો હવે રક્ષણાત્મક નહીં પણ આક્રમક બને અને તૃણમૂલ કોંગ્રેસના નેતાઓ દ્વારા કરવામાં આવેલા નાણાકીય કૌભાંડોને જનતા સમક્ષ ખુલ્લા પાડે. આ મુલાકાત દરમિયાન જૂના દિગ્ગજ નેતા દિલીપ ઘોષની સક્રિયતા પણ જોવા મળી હતી, જે દર્શાવે છે કે ભાજપ આ વખતે આંતરિક મતભેદો ભૂલીને એકજુથ થઈને મેદાનમાં ઉતરશે. શાહે નેતાઓને અઠવાડિયામાં ઓછામાં ઓછા ચાર દિવસ જમીની સ્તરે પ્રચાર કરવા અને દરરોજ પાંચથી છ નાની સભાઓ યોજવા માટે કડક સૂચના આપી છે.

'સોનાર બાંગ્લા' અને સાંસ્કૃતિક વારસાની પુનઃસ્થાપના
ભાજપ માત્ર રાજકીય હુમલાઓ સુધી સીમિત રહેવા માંગતું નથી, પરંતુ બંગાળના ગૌરવશાળી ભૂતકાળને યાદ અપાવીને મતદારોના હૃદય જીતવા માંગે છે. 'સોનાર બાંગ્લા'નું નિર્માણ એ ભાજપનો મુખ્ય સંકલ્પ છે. શાહે ભારપૂર્વક જણાવ્યું કે બંગાળ જે એક સમયે સાહિત્ય, વિજ્ઞાન અને સમૃદ્ધિનું કેન્દ્ર હતું, તેને ફરીથી એ જ ઊંચાઈ પર લઈ જવા માટે ભાજપની સરકાર અનિવાર્ય છે. મતદારોને એ વિશ્વાસ અપાવવો કે ભાજપ જ બંગાળના ખોવાયેલા વારસાને પાછો લાવી શકે છે, તે આ બ્લુપ્રિન્ટનો સૌથી મહત્વનો ભાગ છે.