પ્રયાગરાજ (યુપી) : ઉત્તર પ્રદેશના પવિત્ર તીર્થધામ પ્રયાગરાજમાં આવતીકાલ એટલે કે 3 જાન્યુઆરીથી આસ્થાના પવિત્ર 'માઘ મેળા'નો શંખનાદ થવા જઈ રહ્યો છે. ગંગા, યમુના અને અદ્રશ્ય સરસ્વતીના ત્રિવેણી સંગમ ખાતે વર્ષનું પ્રથમ શાહી સ્નાન 'પોષ પૂર્ણિમા'ના દિવસે યોજાશે. આ મેળો માત્ર મનોરંજન નથી, પરંતુ હિન્દુ સંસ્કૃતિમાં આધ્યાત્મિક શુદ્ધિકરણ અને પાપોમાંથી મુક્તિ મેળવવાનું સૌથી મોટું કેન્દ્ર માનવામાં આવે છે.

6 ભવ્ય સ્નાન અને કલ્પવાસની શરૂઆત

2026 નો આ માઘ મેળો 3 જાન્યુઆરીથી શરૂ થઈને 15 ફેબ્રુઆરી (મહાશિવરાત્રી) સુધી ચાલશે. આ દરમિયાન લાખો શ્રદ્ધાળુઓ કડકડતી ઠંડીમાં રેતી પર રહીને 'કલ્પવાસ' કરશે અને દિવસમાં ત્રણ વાર સંગમમાં સ્નાન કરી જપ-તપ કરશે. મેળામાં છ મુખ્ય સ્નાન તિથિઓ હશે જેનું વિશેષ મહત્વ છે:

· પોષ પૂર્ણિમા: 3 જાન્યુઆરી, 2026 (મેળાનો પ્રારંભ)

· મકરસંક્રાંતિ: 14 જાન્યુઆરી, 2026 (સૂર્યનો ઉત્તરાયણ પ્રવેશ)

· મૌની અમાવસ્યા: 18 જાન્યુઆરી, 2026 (સૌથી મોટું સ્નાન)

· વસંત પંચમી: 23 જાન્યુઆરી, 2026

· માઘી પૂર્ણિમા: 1 ફેબ્રુઆરી, 2026

· મહાશિવરાત્રી: 15 ફેબ્રુઆરી, 2026 (મેળાની પૂર્ણાહુતિ)

મૌની અમાવસ્યા પર ભક્તોનો મહેરામણ

આ વર્ષે 18 જાન્યુઆરીએ મૌની અમાવસ્યા ઉજવાશે. માન્યતા છે કે આ દિવસે સંગમનું પાણી 'અમૃત' સમાન બની જાય છે. આ દિવસે મૌન રહીને સ્નાન કરવાથી વ્યક્તિના જન્મ-જન્માંતરના પાપોનો નાશ થાય છે અને માનસિક શાંતિ મળે છે. આ દિવસે પ્રયાગરાજમાં કરોડોની ભીડ ઉમટી પડવાની શક્યતા છે.

યોગી સરકારની ખાસ વ્યવસ્થા

મુખ્યમંત્રી યોગી આદિત્યનાથે સ્પષ્ટ આદેશ આપ્યો છે કે સ્નાનના મુખ્ય દિવસોએ કોઈ પણ VIP પ્રોટોકોલ લાગુ કરવામાં આવશે નહીં. સામાન્ય શ્રદ્ધાળુઓને કોઈ તકલીફ ન પડે તે માટે અધિકારીઓને સજ્જ રહેવા જણાવાયું છે. સુરક્ષા માટે હજારો પોલીસ જવાનો, ડ્રોન કેમેરા અને જળ પોલીસ તૈનાત કરવામાં આવી છે.

સ્નાન માટે ઉત્તમ સમય: બ્રહ્મ મુહૂર્ત

શાસ્ત્રો મુજબ માઘ સ્નાન માટે સવારે 4:00 થી 5:30 વાગ્યા સુધીનો 'બ્રહ્મ મુહૂર્ત' સર્વોત્તમ માનવામાં આવે છે. આ સમયે સ્નાન કરવાથી અનેકગણું પુણ્ય ફળ મળે છે. ભક્તો અત્યારથી જ સંગમ તટે ડેરા-તંબુ નાખીને આ દૈવી અનુભૂતિ માટે સજ્જ થઈ ગયા છે.

મુસાફરો માટે સૂચના:

· રેલવે અને બસ દ્વારા પ્રયાગરાજ માટે વધારાની સ્પેશિયલ ટ્રેનો અને બસો દોડાવવામાં આવી છે.

· સંગમ વિસ્તારમાં ઠંડી વધુ હોવાથી ગરમ કપડાં સાથે રાખવા વિનંતી.

· મેળામાં ખોવાયેલા-પાયેલા કેન્દ્ર અને સ્વાસ્થ્ય શિબિરોની સુવિધા 24 કલાક ઉપલબ્ધ રહેશે.