નવી દિલ્હી:  અમેરિકી દળોએ વેનેઝુએલામાં કરેલી આ મોટી કાર્યવાહીએ સમગ્ર વિશ્વને ચોંકાવી દીધું છે. ડોનાલ્ડ ટ્રમ્પ વહીવટીતંત્રના આ આક્રમક પગલાએ સાબિત કરી દીધું છે કે અમેરિકા હવે લેટિન અમેરિકામાં પોતાનો પ્રભાવ વધારવા માટે કોઈપણ હદ સુધી જઈ શકે છે. આ ઘટનાને કારણે આંતરરાષ્ટ્રીય રાજનીતિમાં ગરમાવો આવ્યો છે, પરંતુ તેની સૌથી મોટી અને તાત્કાલિક અસર નાણાકીય બજારો પર જોવા મળી રહી છે. જ્યારે પણ કોઈ બે દેશો વચ્ચે સંઘર્ષ વધે છે, ત્યારે રોકાણકારો જોખમી અસ્કયામતો વેચીને સુરક્ષિત ગણાતા રોકાણ તરફ વળે છે, જેની સીધી અસર આવનારા દિવસોમાં સોના-ચાંદીના ભાવ પર દેખાશે.

કોમોડિટી બજારના નિષ્ણાતો માને છે કે સોમવારે જ્યારે બજાર ખુલશે ત્યારે સોના અને ચાંદીમાં 'બુલ રન' જોવા મળી શકે છે. યુદ્ધ કે રાજકીય અસ્થિરતાના સમયે સોનું હંમેશા રોકાણકારો માટે 'સેફ હેવન' રહ્યું છે. MCX પર સોનાના ભાવમાં મોટો ઉછાળો આવી શકે છે, જે સામાન્ય ગ્રાહકો માટે ચિંતાનો વિષય બની શકે છે. ચાંદીમાં પણ ઔદ્યોગિક માંગ અને રોકાણની દ્રષ્ટિએ મજબૂતી જોવા મળશે. જો આ તણાવ લાંબો સમય ચાલશે, તો કિંમતી ધાતુઓ પોતાના જૂના તમામ રેકોર્ડ તોડીને નવી ઐતિહાસિક સપાટી પર પહોંચી શકે છે તેવી પૂરેપૂરી સંભાવના છે.

સૌથી વધુ અસર ક્રૂડ ઓઈલ એટલે કે કાચા તેલ પર પડવાની શક્યતા છે, કારણ કે વેનેઝુએલા વિશ્વના સૌથી મોટા તેલ અનામત ધરાવતા દેશોમાંનો એક છે. ભલે છેલ્લા કેટલાક સમયથી ત્યાં ઉત્પાદન ઓછું હતું, પરંતુ અમેરિકી હસ્તક્ષેપને કારણે ઓઈલ સપ્લાય ચેઈનમાં વિક્ષેપ પડવાની ભીતિ છે. જો બ્રેન્ટ ક્રૂડના ભાવમાં વધારો થશે, તો તેની સીધી અસર ભારતના મોંઘવારી દર પર પડશે. પેટ્રોલ અને ડીઝલના ભાવ વધવાની આશંકા વચ્ચે ટ્રાન્સપોર્ટેશન મોંઘું થઈ શકે છે, જેની અસર સામાન્ય માણસના રસોડા સુધી પહોંચી શકે છે.

બીજી તરફ, ભારતીય શેરબજાર માટે આ સમાચાર મિશ્ર પ્રતિસાદ લાવશે. નિષ્ણાતોના મતે ભારતીય બજારમાં મોટી પાયમાલી થવાની શક્યતા ઓછી છે, કારણ કે ભારતની અર્થવ્યવસ્થા આંતરિક રીતે મજબૂત છે. જોકે, શરૂઆતના થોડા દિવસોમાં 'પેનિક સેલિંગ' જોવા મળી શકે છે. ખાસ કરીને પેઇન્ટ્સ, ટાયર અને એરલાઇન્સ જેવા સેક્ટર, જે ક્રૂડ ઓઇલ પર નિર્ભર છે, તેમના શેરોમાં ઘટાડો જોવા મળી શકે છે. રોકાણકારોએ અત્યારે ઉતાવળે મોટું રોકાણ કરવાને બદલે 'થોભો અને રાહ જુઓ'ની નીતિ અપનાવવી જોઈએ, કારણ કે આગામી 48 કલાક વૈશ્વિક બજારની દિશા નક્કી કરવા માટે ખૂબ જ મહત્વપૂર્ણ સાબિત થશે.