મુંબઈ : મહારાષ્ટ્રમાં આગામી ૧૫ જાન્યુઆરીએ યોજાનારી ૨૯ નગરપાલિકાઓ અને બૃહદ મુંબઈ મહાનગરપાલિકા (BMC) ની ચૂંટણી પહેલા જ સત્તાધારી મહાયુતિ ગઠબંધને જબરદસ્ત મનોવૈજ્ઞાનિક સરસાઈ મેળવી લીધી છે. ઉમેદવારી ફોર્મ ખેંચવાની અંતિમ મુદત પૂરી થતાની સાથે જ રાજ્યભરની વિવિધ બેઠકો પરથી મહાયુતિના કુલ ૬૮ ઉમેદવારો બિનહરીફ વિજેતા જાહેર કરવામાં આવ્યા છે.
બેઠકોનું ગણિત અને ભાજપનો પક્ષ:
નિર્વિરોધ ચૂંટાયેલા ૬૮ ઉમેદવારોમાં સૌથી વધુ ૪૪ બેઠકો ભારતીય જનતા પાર્ટીએ અંકે કરી છે. જ્યારે મુખ્યમંત્રી એકનાથ શિંદેની શિવસેનાને ૨૨ બેઠકો અને અજિત પવારની એનસીપીને ૨ બેઠકો મળી છે. સૌથી વધુ બિનહરીફ જીત થાણે જિલ્લાના કલ્યાણ-ડોમ્બિવલી મહાનગરપાલિકામાં નોંધાઈ છે. આ ઉપરાંત પુણે, પિંપરી-ચિંચવડ, પનવેલ, ભિવંડી, ધુલે, જલગાંવ અને અહિલ્યાનગરમાં પણ મહાયુતિએ જીતનો પંજો લંબાવ્યો છે.
પુણેના વોર્ડ નંબર ૩૫ માંથી ભાજપના ઉમેદવાર મંજૂષા નાગપુરે અને શ્રીકાંત જગતાપને બિનહરીફ જાહેર કરાયા છે. કેન્દ્રીય મંત્રી મુરલીધર મોહોલે આ જીતને ભાજપના કામ પર જનતાનો ભરોસો ગણાવતા દાવો કર્યો છે કે પુણેમાં ભાજપનો જ મેયર બનશે. તેમણે ઉમેર્યું કે ૧૨૫ બેઠકો જીતવાના લક્ષ્યાંકમાંથી ૨ બેઠકો તો અમે અત્યારથી જ જીતી લીધી છે. ભાજપ પ્રવક્તા કેશવ ઉપાધ્યાયે આ ટ્રેન્ડનો શ્રેય દેવેન્દ્ર ફડણવીસની લોકપ્રિયતા અને પ્રદેશ પ્રમુખ રવિન્દ્ર ચવ્હાણની વ્યૂહરચનાને આપ્યો છે.
વિપક્ષના આકરા પ્રહાર:
બીજી તરફ, ઉદ્ધવ ઠાકરે જૂથની શિવસેનાએ આ જીત સામે ગંભીર સવાલો ઉઠાવ્યા છે. સાંસદ પ્રિયંકા ચતુર્વેદીએ આક્ષેપ કર્યો હતો કે વિપક્ષના ઉમેદવારોને ED અને CBI જેવી તપાસ એજન્સીઓના ડર બતાવીને અથવા તો મોટી રકમની સોદાબાજી કરીને નામ પાછા ખેંચવા મજબૂર કરવામાં આવ્યા છે. તેમણે આ બાબતે ચૂંટણી પંચની મૌન ભૂમિકા પર પણ આકરા પ્રહાર કર્યા હતા અને તેને લોકશાહીની હત્યા ગણાવી હતી.
ઉલ્લેખનીય છે કે, મુંબઈની BMC સહિત રાજ્યની ૨૯ મહાનગરપાલિકાઓ માટે ૧૫ જાન્યુઆરીએ મતદાન થશે અને બીજા જ દિવસે એટલે કે ૧૬ જાન્યુઆરીએ મતગણતરી હાથ ધરવામાં આવશે. આ ૬૮ બેઠકોની જીતથી સત્તાધારી પક્ષોમાં ઉત્સાહ જોવા મળી રહ્યો છે, જ્યારે વિપક્ષ આક્રમક મૂડમાં છે.