કરાકાસ : વેનેઝુએલાના રાજકીય ઇતિહાસમાં આજે એક ભૂકંપ જેવી ઘટના બની છે. અમેરિકી દળો દ્વારા રાષ્ટ્રપતિ નિકોલસ માદુરોની ધરપકડ (કબજો) કર્યાના ગણતરીના કલાકોમાં જ, લાંબા સમયથી છુપાઈને રહેલા વિપક્ષી નેતા અને નોબેલ શાંતિ પુરસ્કાર વિજેતા મારિયા કોરિના મચાડોએ મૌન તોડ્યું છે. સોશિયલ મીડિયા પ્લેટફોર્મ 'X' પર એક અત્યંત જુસ્સાદાર પોસ્ટમાં તેમણે જાહેરાત કરી છે કે, "વેનેઝુએલાના લોકો, સ્વતંત્રતાનો સમય આવી ગયો છે!"

માદુરોને ન્યાયનો સામનો કરવો પડશે

મારિયા મચાડોએ તેમના નિવેદનમાં જણાવ્યું હતું કે, નિકોલસ માદુરોએ વેનેઝુએલાની જનતા અને આંતરરાષ્ટ્રીય સમુદાય વિરુદ્ધ ઘૃણાસ્પદ ગુનાઓ કર્યા છે. તેમણે વાટાઘાટો દ્વારા સત્તા છોડવાનો ઇનકાર કર્યો હોવાથી, અમેરિકાએ કાયદાનું પાલન કરીને તેમને સત્તા પરથી હટાવવાનું પોતાનું વચન પૂરું કર્યું છે. હવે માદુરોએ આંતરરાષ્ટ્રીય ન્યાયનો સામનો કરવો પડશે.

નવા રાષ્ટ્રપતિની તાત્કાલિક નિમણૂકની માંગ

જુલાઈ 2024 ની ચૂંટણીના વિવાદ બાદથી અજ્ઞાતવાસમાં રહેલા મારિયાએ સ્પષ્ટ કર્યું કે, વિપક્ષી ઉમેદવાર એડમુન્ડો ગોન્ઝાલેઝ ઉરુટિયા જ વેનેઝુએલાના કાયદેસરના રાષ્ટ્રપતિ છે. તેમણે માંગ કરી કે ગોન્ઝાલેઝે તાત્કાલિક પોતાનો બંધારણીય આદેશ સ્વીકારી લેવો જોઈએ અને રાષ્ટ્રીય સશસ્ત્ર દળોએ તેમને જ પોતાના 'કમાન્ડર-ઇન-ચીફ' તરીકે માન્યતા આપવી જોઈએ.

નવા વેનેઝુએલાનું સપનું

પોતાના નિવેદનમાં ભાવુક થતા મારિયાએ કહ્યું, "આપણે વર્ષોથી લડ્યા છીએ અને બધું જ દાવ પર લગાવી દીધું છે. હવે સમય આવી ગયો છે કે આપણે વ્યવસ્થા પુનઃસ્થાપિત કરીએ, તમામ રાજકીય કેદીઓને જેલમાંથી મુક્ત કરીએ અને એક એવું રાષ્ટ્ર બનાવીએ કે જેમના બાળકો વિદેશ છોડીને ફરી પોતાના ઘરે પાછા ફરે."

લોકશાહીનો વિજય

28 જુલાઈના રોજ જેમણે લોકશાહી માટે જોખમ ઉઠાવ્યું હતું તેવા લાખો નાગરિકોને સંબોધતા તેમણે કહ્યું કે હવે નાગરિકોનો સમય શરૂ થયો છે. વેનેઝુએલાના રસ્તાઓ પર અત્યારે ગજબનો ઉત્સાહ અને અજંપો બંને જોવા મળી રહ્યા છે, કારણ કે દાયકાઓ જૂની સરમુખત્યારશાહીનો અંત આવતા હવે આખો દેશ નવી આશા સાથે જોઈ રહ્યો છે.