નવી દિલ્હી : નવી દિલ્હીમાં આયોજિત 'ચિંતન શિબિર'માં કેન્દ્રીય રસાયણ અને ખાતર મંત્રી જે.પી. નડ્ડાએ ભારતીય કૃષિ ક્ષેત્રને લઈને સરકારની દૂરંદેશી નીતિઓ વિશે મહત્વનું નિવેદન આપ્યું છે. તેમણે ભારપૂર્વક જણાવ્યું હતું કે કેન્દ્ર સરકારની તમામ નીતિઓનો મુખ્ય ઉદ્દેશ્ય ખેડૂતોના જીવનને સરળ, સુરક્ષિત અને વધુ આવકવાળું બનાવવાનો છે.

ખાતર ઉત્પાદનમાં ઐતિહાસિક સિદ્ધિ

મંત્રીએ માહિતી આપી હતી કે સરકાર દ્વારા લેવામાં આવેલા ખેડૂત-લક્ષી પગલાંને કારણે આ વર્ષે દેશમાં ખાતરનું રેકોર્ડબ્રેક ઉત્પાદન શક્ય બન્યું છે. જોકે, જરૂરિયાત મુજબ અમુક જથ્થાની આયાત હજુ ચાલુ છે, પરંતુ સરકારનો અંતિમ ધ્યેય ખાતર ક્ષેત્રે સંપૂર્ણ 'આત્મનિર્ભરતા' હાંસલ કરવાનો છે.

ખાતરનો સંતુલિત ઉપયોગ અને ગેરરીતિ સામે લાલ આંખ

શિબિર દરમિયાન જે.પી. નડ્ડાએ બે મુખ્ય પડકારો પર ધ્યાન કેન્દ્રિત કર્યું:

1.      સંતુલિત ઉપયોગ: જમીનની ફળદ્રુપતા જાળવવા ખેડૂતો ખાતરનો મર્યાદિત અને યોગ્ય ઉપયોગ કરે તે માટે જાગૃતિ અભિયાન તેજ કરાશે.

2.      દુરુપયોગ પર રોક: ખાતરનો બિન-કૃષિ હેતુઓ (ઔદ્યોગિક વપરાશ) માટે થતો ગેરકાયદેસર ઉપયોગ અટકાવવા કડક પગલાં લેવામાં આવશે.

ડિજિટલ ક્રાંતિ અને 2047નું વિઝન

આ પ્રસંગે રાજ્યમંત્રી અનુપ્રિયા પટેલે જણાવ્યું હતું કે આ શિબિર માત્ર ચર્ચા પૂરતી મર્યાદિત નથી, પરંતુ તે 2047 સુધીમાં ભારતને વિકસિત રાષ્ટ્ર બનાવવા માટેના બીજ રોપી રહી છે. શિબિરમાં 15 અલગ-અલગ જૂથોએ ભાગ લીધો હતો, જેમાં ડિજિટલ માધ્યમો દ્વારા ખાતરના વિતરણને પારદર્શક બનાવવા અને ખેડૂતોને સીધી માહિતી પૂરી પાડવા વિશે સઘન મંથન કરવામાં આવ્યું હતું.

સરકાર હવે ખાતર ઇકોસિસ્ટમમાં સુધારો કરવા માટે આધુનિક ટેકનોલોજીનો મહત્તમ ઉપયોગ કરવા જઈ રહી છે, જેથી છેવાડાના ખેડૂત સુધી સરકારી મદદ વચેટિયાઓ વગર પહોંચી શકે.