સહારનપુર: ઉત્તરાખંડના જ્યોતિર્મઠના શંકરાચાર્ય સ્વામી અવિમુક્તેશ્વરાનંદે બાંગ્લાદેશમાં હિન્દુઓ વિરુદ્ધ થઈ રહેલી હિંસા અંગે ભારત સરકારની નીતિઓ પર આકરા સવાલો ઉઠાવ્યા છે. સહારનપુરની મુલાકાતે આવેલા શંકરાચાર્યએ એક સનસનાટીભર્યું નિવેદન આપતા કહ્યું કે, બાંગ્લાદેશમાં હિન્દુઓ પર થઈ રહેલા હુમલાઓ માટે શેખ હસીનાને ભારતમાં આપવામાં આવેલો આશ્રય એક મોટું કારણ છે.
શંકરાચાર્યએ આરોપ લગાવ્યો કે, બાંગ્લાદેશના લોકોએ જે નેતાને દેશમાંથી હાંકી કાઢ્યા હતા, તે શેખ હસીના ભારતમાં મુક્તપણે ફરી રહ્યા છે અને ખરીદી કરી રહ્યા છે. સોશિયલ મીડિયા પર જ્યારે તેમના ફોટા અને વીડિયો બાંગ્લાદેશ પહોંચે છે, ત્યારે ત્યાંના લોકોમાં ભારત અને ત્યાં વસતા હિન્દુઓ પ્રત્યે નફરત વધે છે. તેમણે પ્રશ્ન કર્યો કે, જે મહિલાએ ઔપચારિક રીતે આશ્રય માંગ્યો ન હતો, તેને સરકારે સંસદમાં ચર્ચા કર્યા વગર આ રીતે રાખવી કેટલી યોગ્ય છે?
 સ્વામી અવિમુક્તેશ્વરાનંદે સરકારને ચેતવણી આપતા કહ્યું કે, પાકિસ્તાન અને બાંગ્લાદેશનું ડીએનએ સમાન છે. જો ભારત સરકાર અત્યારે પારદર્શક અને નક્કર પગલાં નહીં ભરે, તો ભવિષ્યમાં બાંગ્લાદેશ પણ પાકિસ્તાનની જેમ ભારત વિરુદ્ધ આક્રમક વલણ અપનાવી શકે છે. તેમણે અપીલ કરી કે સરકારે આ મામલે સ્પષ્ટતા કરવી જોઈએ જેથી બાંગ્લાદેશના લોકોમાં ફેલાયેલી ભારત વિરોધી લાગણી ડામી શકાય.
 માત્ર બાંગ્લાદેશ જ નહીં, શંકરાચાર્યએ દેશની આંતરિક વસ્તી અંગે પણ ચિંતા વ્યક્ત કરી હતી. તેમણે પૂછ્યું કે, ૧.૫ અબજની વસ્તીમાં ૨૧ કરોડ લોકો અચાનક ક્યાંથી આવ્યા? તેની સંપૂર્ણ તપાસ થવી જોઈએ. વધુમાં, મતદાર યાદી સુધારણા મામલે તેમણે કહ્યું કે, સાચા મતદારોના નામ દૂર કરવા કે નકલી મતદારો ઉમેરવા એ દેશ વિરુદ્ધનો મોટો ગુનો છે અને ચૂંટણી પંચે આમાં સંપૂર્ણ પારદર્શિતા રાખવી જોઈએ. સહારનપુરના મા શાકંભરી દેવીના શંકરાચાર્ય આશ્રમમાં આપવામાં આવેલા આ નિવેદને હવે રાજકીય અને ધાર્મિક વર્તુળોમાં નવી ચર્ચા છેડી દીધી છે.