ઉત્તર કોરિયાએ નવા વર્ષ ૨૦૨૬ની શરૂઆતમાં જ ફરી એકવાર ઉશ્કેરણીજનક પગલું ભરતાં જાપાન સાગર (ઈસ્ટ સી) તરફ બેલેસ્ટિક મિસાઈલો દાગી છે. દક્ષિણ કોરિયા અને જાપાનના સૈન્ય દ્વારા આ મિસાઈલ પરીક્ષણની પુષ્ટિ કરવામાં આવી છે. આ મિસાઈલો લગભગ ૯૦૦ કિલોમીટર સુધી ઉડી હતી.

રવિવારે વહેલી સવારે ઉત્તર કોરિયાએ તેના પૂર્વીય તટ પરથી એક સાથે અનેક બેલેસ્ટિક મિસાઈલોનું પરીક્ષણ કર્યું હતું. દક્ષિણ કોરિયાના ‘જોઈન્ટ ચીફ્સ ઓફ સ્ટાફ’ (જેસીએસ) ના અહેવાલ મુજબ, આ મિસાઈલો ઉત્તર કોરિયાની રાજધાની પ્યોંગયાંગ નજીકથી સવારે ૭:૫૦ વાગ્યે (સ્થાનિક સમય મુજબ) છોડવામાં આવી હતી. આ મિસાઈલોએ લગભગ ૯૦૦ કિલોમીટરનું અંતર કાપ્યું હતું અને ૫૦ કિલોમીટરની ઊંચાઈ પ્રાપ્ત કરી હતી. અંતે આ મિસાઈલો જાપાનના વિશેષ આર્થિક ક્ષેત્ર (ઈઈઝેડ) ની બહાર સમુદ્રમાં ખાબકી હતી.

​જાપાનના રક્ષા મંત્રાલયે પણ આ ઘટનાની ગંભીર નોંધ લીધી છે. જાપાની અધિકારીઓના જણાવ્યા મુજબ, આ મિસાઈલો અનિયમિત માર્ગ પર ઉડી હોવાની શક્યતા છે, જેને કારણે તેને ઈન્ટરસેપ્ટ કરવી મુશ્કેલ બની શકે છે. આ ઘટના બાદ જાપાન સરકારે તેમના જહાજો અને વિમાનોની સુરક્ષા માટે ચેતવણી જાહેર કરી દીધી છે, જોકે હજુ સુધી કોઈ નુકસાનના સમાચાર નથી. નિષ્ણાતોના મતે, ઉત્તર કોરિયા દ્વારા આ વર્ષનું આ પ્રથમ મોટું શસ્ત્ર પરીક્ષણ છે, જેનો ઉદ્દેશ્ય તેમની લશ્કરી ક્ષમતાનું પ્રદર્શન કરવાનો છે.

ન્યુઝ ફર્સ્ટ ના અહેવાલ પ્રમાણે ઉત્તર કોરિયાના મિસાઈલ હુમલા બાદ દક્ષિણ કોરિયાના રાષ્ટ્રપતિ કાર્યાલયે તાત્કાલિક અસરથી ‘રાષ્ટ્રીય સુરક્ષા પરિષદ’ (એનએસસી) ની ઈમરજન્સી બેઠક બોલાવી હતી. આ ઘટના રાષ્ટ્રપતિ લી જે-મ્યુંગની ચીન મુલાકાત પૂર્વે બની હોવાથી તેને રાજદ્વારી દબાણ તરીકે જોવામાં આવી રહ્યું છે.

ઉત્તર કોરિયાના મિસાઈલ પરીક્ષણના ગણતરીના કલાકોમાં જ દક્ષિણ કોરિયાના રાષ્ટ્રપતિ કાર્યાલય (બ્લુ હાઉસ) ખાતે રાષ્ટ્રીય સુરક્ષા પરિષદની એક ઈમરજન્સી બેઠક યોજવામાં આવી હતી. આ બેઠકમાં દેશની સુરક્ષા સ્થિતિની સમીક્ષા કરવામાં આવી હતી અને ઉત્તર કોરિયાના આ પગલાંની આકરી ટીકા કરવામાં આવી હતી. દક્ષિણ કોરિયાના સત્તાવાર નિવેદનમાં જણાવવામાં આવ્યું છે કે, "ઉત્તર કોરિયાનું આ કૃત્ય સંયુક્ત રાષ્ટ્ર સુરક્ષા પરિષદના ઠરાવોનું સ્પષ્ટ ઉલ્લંઘન છે અને કોરિયન દ્વીપકલ્પ પર શાંતિ માટે ગંભીર ખતરો છે."

​આ ઘટનાનું મહત્વ એટલા માટે વધી જાય છે કારણ કે દક્ષિણ કોરિયાના રાષ્ટ્રપતિ લી જે-મ્યુંગ ચીનના રાષ્ટ્રપતિ શી જિનપિંગ સાથે શિખર મંત્રણા (સમિટ) માટે બેઈજિંગ જવા રવાના થવાના હતા તેના થોડા સમય પહેલા જ આ મિસાઈલો દાગવામાં આવી હતી. રાષ્ટ્રપતિ લી તેમની ચીન મુલાકાત દરમિયાન ઉત્તર કોરિયાના પરમાણુ કાર્યક્રમ અને ક્ષેત્રીય શાંતિ અંગે ચર્ચા કરવાના છે. દક્ષિણ કોરિયાની સેનાએ અમેરિકા અને જાપાન સાથે મળીને સર્વેલન્સ અને સતર્કતા વધારી દીધી છે અને તેઓ ઉત્તર કોરિયાની દરેક ગતિવિધિ પર ચાંપતી નજર રાખી રહ્યા છે.