ગુવાહાટી: બોલીવુડના પીઢ અભિનેતા આશિષ વિદ્યાર્થી અને તેમની પત્ની રૂપાલી બરુઆ ગુવાહાટીમાં એક ભયાનક માર્ગ અકસ્માતનો શિકાર બન્યા હોવાના સમાચારથી સોશિયલ મીડિયા પર ચિંતાનું મોજું ફરી વળ્યું છે. શુક્રવારની રાત્રે જ્યારે આ દંપતી રસ્તો ક્રોસ કરી રહ્યું હતું, ત્યારે એક બેકાબૂ બાઈક સવારે તેમને જોરદાર ટક્કર મારી હતી. અકસ્માત એટલો જોરદાર હતો કે આશિષ અને રૂપાલી બંને રસ્તા પર પટકાયા હતા અને તેમને નાની-મોટી ઈજાઓ પહોંચી હતી. સમાચાર વાયુવેગે ફેલાતા ફેન્સમાં ગભરાટ ફેલાયો હતો, જેને પગલે આશિષ વિદ્યાર્થીએ પોતે સોશિયલ મીડિયા પર આવીને સત્ય હકીકત જણાવવી પડી હતી.
અભિનેતાએ ઇન્સ્ટાગ્રામ પર એક ‘વિચિત્ર સમયે’ લાઈવ થઈને ચાહકોને આશ્વાસન આપ્યું હતું કે તેઓ સુરક્ષિત છે. આશિષે વીડિયોમાં જણાવ્યું કે, "ન્યૂઝ ચેનલો પર ચાલી રહેલા અહેવાલો વચ્ચે હું તમને જણાવવા માંગુ છું કે અકસ્માત ચોક્કસ થયો હતો, પણ અમે બચી ગયા છીએ." તેમણે વધુમાં ઉમેર્યું કે તેમની પત્ની રૂપાલી હાલ હોસ્પિટલમાં તબીબી નિરીક્ષણ હેઠળ છે. પોતાની શારીરિક સ્થિતિ બતાવવા માટે આશિષે કેમેરા સામે ચાલીને પણ બતાવ્યું હતું, જોકે તેમના શરીર પર અકસ્માતના નિશાન અને ઈજાઓ સ્પષ્ટ દેખાતી હતી. તેમણે ચાહકોને વિનંતી કરી કે ગભરાવાની જરૂર નથી, તેઓ રિકવરી કરી રહ્યા છે.
માનવતાનું ઉદાહરણ પૂરું પાડતા આશિષ વિદ્યાર્થીએ માત્ર પોતાની જ નહીં, પણ તેમને ટક્કર મારનાર બાઈક સવારની પણ ચિંતા વ્યક્ત કરી હતી. તેમણે જણાવ્યું કે તેમણે પોલીસ પાસેથી બાઈક સવાર વિશે માહિતી મેળવી છે અને રાહતની વાત એ છે કે તે યુવાન પણ હવે ભાનમાં આવી ગયો છે. આશિષે કહ્યું કે, "અમે તેની પણ પૂરી કાળજી રાખી રહ્યા છીએ, ઈશ્વર કરે બધું સારું થઈ જાય." અકસ્માતની આ પળોમાં પણ કોઈના પર આક્ષેપ કરવાને બદલે આશિષે જે સંયમ અને ઉદારતા બતાવી છે, તેના કારણે સોશિયલ મીડિયા પર તેમના ખૂબ વખાણ થઈ રહ્યા છે.
ઉલ્લેખનીય છે કે આશિષ વિદ્યાર્થીએ વર્ષ 2023માં ગુવાહાટીની બિઝનેસવુમન રૂપાલી બરુઆ સાથે લગ્ન કરીને સોશિયલ મીડિયા પર ચર્ચા જગાવી હતી. 60 વર્ષની ઉંમરે ફરીથી નવું જીવન શરૂ કરનાર આશિષ હાલમાં જ કરણ જોહરના રિયાલિટી શો 'ધ ટ્રેટર્સ'માં જોવા મળ્યા હતા. હાલમાં તેઓ ગુવાહાટીમાં પોતાના પરિવાર સાથે સમય વિતાવી રહ્યા હતા ત્યારે આ દુર્ઘટના ઘટી હતી. હોસ્પિટલના સૂત્રોના જણાવ્યા અનુસાર, રૂપાલીની સ્થિતિ સ્થિર છે અને ટૂંક સમયમાં જ તેમને રજા આપવામાં આવશે. ચાહકો હવે આ દંપતીના ઝડપી સ્વાસ્થ્ય લાભ માટે પ્રાર્થના કરી રહ્યા છે.