પુણે:મહારાષ્ટ્રમાં મ્યુનિસિપલ ચૂંટણીનો શંખનાદ ફૂંકાઈ ચૂક્યો છે ત્યારે પુણેના હડપસર વિસ્તારમાં બનેલી એક હૃદયદ્રાવક ઘટનાએ સમગ્ર રાજ્યના રાજકારણમાં ખળભળાટ મચાવી દીધો છે. ૫૬ વર્ષીય સાદિક ઉર્ફે બાબુ કપૂરે કેમ્પ વિસ્તારમાં આવેલી પોતાની ઓફિસમાં ફાંસી લગાવી જીવન ટૂંકાવ્યું હતું. આ સામાન્ય આત્મહત્યા નથી, પરંતુ એક વ્યવસ્થિત 'પોલિટિકલ ક્રાઈમ' હોવાનું જણાઈ રહ્યું છે, કારણ કે સાદિકે મરતા પહેલા પોતાના શરીરના અંગો પર અજિત પવારની રાષ્ટ્રવાદી કોંગ્રેસ પાર્ટી (NCP) ના વોર્ડ ૪૧ ના ઉમેદવાર ફારુક શેખનું નામ લખીને સૌને સ્તબ્ધ કરી દીધા છે.

પોલીસ તપાસમાં ઘટનાસ્થળેથી લોહી થીજી જાય તેવી વિગતો ધરાવતી ૩૦ પાનાની એક સુસાઈડ નોટ મળી આવી છે. આ લાંબી પત્રિકામાં સાદિકે તેને આપવામાં આવેલા અસહ્ય માનસિક ત્રાસ અને ધમકીઓનું વર્ણન કર્યું છે. આ આત્મહત્યા પાછળ હડપસરના સૈયદ નગર વિસ્તારમાં આવેલી અંદાજે ૧૦ કરોડ રૂપિયાની કિંમતી જમીનનો વિવાદ હોવાનું સામે આવ્યું છે. મૃતક સાદિકે પત્રમાં આરોપ લગાવ્યો છે કે ફારુક શેખ અને તેના સાગરીતો છેલ્લા ઘણા સમયથી આ જમીન હડપવા માટે તેના પર દબાણ કરી રહ્યા હતા અને તેને જાનથી મારી નાખવાની ધમકીઓ આપતા હતા.

આ ઘટના બાદ પુણે પોલીસની ક્રાઈમ બ્રાન્ચ એક્શનમાં આવી છે. સાદિકના શરીર પર લખેલા નામો અને સુસાઈડ નોટને મુખ્ય પુરાવા તરીકે ગણીને પોલીસે એફ.આઈ.આર. નોંધવાની તજવીજ હાથ ધરી છે. ચૂંટણી ટાણે જ પક્ષના ઉમેદવારનું નામ આવા ગંભીર કેસમાં ઉછળતા અજિત પવાર જૂથ પણ રક્ષણાત્મક મોડમાં આવી ગયું છે. વિરોધ પક્ષોએ આ મુદ્દે સરકારને ઘેરીને નિષ્પક્ષ તપાસની માંગ કરી છે. શહેરના શાંત ગણાતા કેમ્પ વિસ્તારમાં બનેલી આ ઘટનાથી સ્થાનિક રહીશોમાં રોષ અને ડરનો માહોલ જોવા મળી રહ્યો છે.

હાલમાં સાદિક કપૂરના મૃતદેહને પોસ્ટમોર્ટમ માટે મોકલવામાં આવ્યો છે અને તેની ઓફિસને સીલ કરી દેવામાં આવી છે. ૩૦ પાનાના પત્રમાં જમીનના સોદામાં સામેલ અન્ય કેટલાક મોટા માથાઓના નામ પણ હોવાની ચર્ચા છે, જે આગામી દિવસોમાં પુણેના રાજકારણમાં મોટો ધડાકો કરી શકે છે. સાદિકના પરિવારે ન્યાય ન મળે ત્યાં સુધી અંતિમ સંસ્કાર કરવાનો ઇનકાર કર્યો છે, જેને પગલે પોલીસ બંદોબસ્ત પણ વધારી દેવામાં આવ્યો છે. આ કિસ્સો હવે માત્ર એક આત્મહત્યા નથી રહ્યો, પરંતુ અબજો રૂપિયાના જમીન કૌભાંડ અને રાજકીય વગનો પરપોટો ફોડનારો સાબિત થઈ રહ્યો છે.