વૃંદાવન: IPL 2026 ના મેદાનમાં ક્રિકેટ કરતા રાજકીય અને ધાર્મિક વિવાદોનો સ્કોર વધુ તેજ થઈ રહ્યો છે. કોલકાતા નાઈટ રાઈડર્સ (KKR) દ્વારા બાંગ્લાદેશી ખેલાડી મુસ્તફિઝુર રહેમાનને 9 કરોડમાં ખરીદ્યા બાદ સર્જાયેલા વિવાદમાં હવે વૃંદાવનના પ્રખ્યાત કથાકાર અનિરુદ્ધાચાર્ય મહારાજ પણ કુદી પડ્યા છે. મહારાજે માત્ર KKR જ નહીં, પરંતુ સમગ્ર બોલિવૂડ ઉદ્યોગ પર નિશાન સાધતા કહ્યું કે, જે લોકો ભારતીય જનતાના પૈસા પર 'સુપરસ્ટાર' બન્યા છે, તેમના હૃદય આજે એવા લોકો માટે ધડકી રહ્યા છે જેઓ હિન્દુઓ અને સનાતનીઓને નફરત કરે છે. તેમણે આ હિલચાલને દેશ અને ધર્મ સાથેનો મોટો વિશ્વાસઘાત ગણાવ્યો છે.
અનિરુદ્ધાચાર્ય મહારાજે બોલિવૂડના સ્ટાર્સ પર અહંકારનો આરોપ લગાવતા કહ્યું કે, આ લોકો પાસે એટલા પૈસા આવી ગયા છે કે તેઓ પોતાને ભગવાન સમજવા લાગ્યા છે. તેમણે આકરા પ્રહાર કરતા પૂછ્યું કે, "બોલિવૂડ એટલે શું? શક્તિ? શું પૈસાના જોરે તમે સમાજમાં ગુટખા, દારૂ અને જુગાર જેવી બદીઓનો પ્રચાર કરશો?" મહારાજે સ્પષ્ટ કર્યું કે ફિલ્મી હસ્તીઓ પોતાની ફિલ્મો હિન્દુઓને વેચીને કરોડોની કમાણી કરે છે અને પછી એ જ પૈસા બાંગ્લાદેશી ખેલાડીઓ પર ઉડાવે છે. તેમણે સવાલ કર્યો કે શું આ સામાન્ય જનતાની શ્રદ્ધા સાથે છેતરપિંડી નથી?

બાંગ્લાદેશમાં હિન્દુઓ પર થતા અત્યાચારોનો ઉલ્લેખ કરતા મહારાજે ભાવુક થઈને કહ્યું કે, "આપણી સાથે રમે અને સાથે જમે તે મિત્ર કહેવાય, પણ જે આપણા સનાતનીઓને દિવસે જીવતા સળગાવી દે, તેની સાથે ક્રિકેટ કેમ રમાય?" તેમણે તાજેતરની એક હૃદયદ્રાવક ઘટનાનો ઉલ્લેખ કર્યો જેમાં એક બાળકને નિર્દયતાથી મારી નાખવામાં આવ્યો હતો. મહારાજે સવાલ ઉઠાવ્યો કે શું 9 કરોડમાં ખરીદી કરનારા માલિકો પાસે એટલી સમજ નથી કે તેઓ ભારતીય હોવાનું સન્માન જાળવી શકે? તેમણે સાફ શબ્દોમાં કહ્યું કે જેમના હાથ સનાતનીઓના લોહીથી ખરડાયેલા છે, તેમની સાથે રમત રમીને તમે હિન્દુઓની શ્રદ્ધા તોડી છે.