મુંબઈ : આગામી ૧૫ જાન્યુઆરીએ યોજાનારી બૃહન્મુંબઈ મહાનગરપાલિકા (BMC)ની ચૂંટણીના પ્રચારના શ્રીગણેશ કરતા મહારાષ્ટ્રના મુખ્યમંત્રી દેવેન્દ્ર ફડણવીસે મુંબઈના વરલી વિસ્તારમાં એક ભવ્ય રેલીને સંબોધિત કરી હતી. ભાજપ-શિવસેના મહાયુતિ ગઠબંધનની આ પ્રથમ રેલીમાં મુખ્યમંત્રીએ હિન્દુત્વ, મરાઠી અસ્મિતા અને વિકાસના મુદ્દે વિરોધીઓ પર આકરા પ્રહારો કર્યા હતા.
ઘૂસણખોરી અને મેયર પદ અંગે આક્રમક વલણ:
મુખ્યમંત્રી દેવેન્દ્ર ફડણવીસે સ્પષ્ટ શબ્દોમાં જણાવ્યું હતું કે, "અમે મુંબઈમાં રહેતા બાંગ્લાદેશી ઘૂસણખોરોને ઓળખી કાઢીશું અને તેમને દેશનિકાલ કરીને મુંબઈને વધુ સુરક્ષિત બનાવીશું. છેલ્લા સાત મહિનામાં અનેક ઘૂસણખોરોને પરત મોકલાયા છે અને આ પ્રક્રિયા અટકશે નહીં." મેયર પદ અંગે વાત કરતા તેમણે ઉમેર્યું કે, "એકનાથ શિંદે અને મેં સ્પષ્ટ નક્કી કર્યું છે કે મુંબઈના મેયર હંમેશા મરાઠી અને હિન્દુ જ હશે. જે લોકો બુરખાધારી મહિલાને મેયર બનાવવાની વાતો કરે છે અને મરાઠી અસ્મિતાના નામે મૌન સેવે છે તેમને જનતા જવાબ આપશે."
વિકાસ અને પર્યાવરણનું વિઝન:
મુંબઈના ભવિષ્ય અંગે મોટું આયોજન રજૂ કરતા ફડણવીસે ₹૧૭,૦૦૦ કરોડના વિશેષ પર્યાવરણીય બજેટની જાહેરાત કરી હતી, જેનો હેતુ મુંબઈને દેશનું સૌથી ટકાઉ શહેર બનાવવાનો છે. આ ઉપરાંત, તેમણે ૪૫૦ કિલોમીટર લાંબા મેટ્રો નેટવર્કની વિગતો આપતા કહ્યું કે, ૧૫૦ કિમી લાઇન કાર્યરત છે અને એવી વ્યવસ્થા ગોઠવાઈ રહી છે કે આખા MMR વિસ્તારમાં ગમે ત્યાં ૫૯ મિનિટમાં પહોંચી શકાશે.
મરાઠી માણસ અને આવાસ યોજના:
ભૂતકાળની સરકારો પર પ્રહાર કરતા તેમણે સવાલ કર્યો કે, "જો મરાઠી માણસે લાચારીમાં મુંબઈ છોડવું પડ્યું હોય તો BMCની ₹૭૦,૦૦૦ કરોડની ફિક્સ્ડ ડિપોઝિટ (FD) શું કામની?" તેમણે વરલીની BDD ચાલના પુનઃવિકાસનું ઉદાહરણ આપતા કહ્યું કે, સરકારે ૧૦૦ ચોરસ ફૂટના મકાનમાં રહેતા ૮૦,૦૦૦ લોકોને ૫૦૦ ચોરસ ફૂટના ઘર વિનામૂલ્યે આપ્યા છે. તેમણે સંકલ્પ કર્યો હતો કે મુંબઈમાં રહેતા દરેક ઝૂંપડપટ્ટીવાસી સહિત તમામ મુંબઈગરા પાસે પોતાનું પાકું ઘર હશે.
ચૂંટણીનો સમય અને રાજકીય કટાક્ષ:
૧૫ જાન્યુઆરીએ ઉત્તરાયણના પવિત્ર સમયે યોજાનારી આ ચૂંટણીને તેમણે મુંબઈના ભાગ્યના ઉદય સમાન ગણાવી હતી. ૧૬ જાન્યુઆરીએ મતના પરિણામો અને છત્રપતિ સંભાજી મહારાજના રાજ્યાભિષેક વર્ષગાંઠના સંયોગને તેમણે મહાયુતિના વિજયના પ્રતીક તરીકે દર્શાવ્યા હતા. વિરોધ પક્ષો દ્વારા મુંબઈને મહારાષ્ટ્રથી અલગ કરવાના આક્ષેપો પર કટાક્ષ કરતા તેમણે કહ્યું કે, "મેં તપાસ કરી છે, મુંબઈ મહારાષ્ટ્રમાં જ છે અને કાયમ રહેશે. ચૂંટણી આવતા જ કેટલાક લોકો સંતુલન ગુમાવી બેસે છે."
નોંધનીય છે કે BMC સહિત ૨૯ પાલિકાઓની ચૂંટણી ૧૫ જાન્યુઆરીએ યોજાશે અને ૧૬ જાન્યુઆરીએ મતગણતરી હાથ ધરવામાં આવશે. ૨૨૭ વોર્ડ ધરાવતી BMCની આ ચૂંટણી મુંબઈના આવનારા દાયકાનું ભવિષ્ય નક્કી કરશે તેમ મુખ્યમંત્રીએ ભારપૂર્વક જણાવ્યું હતું.