નોઈડા:નોઈડાના પોશ વિસ્તાર ગણાતા સેક્ટર ૧૦૪માં શનિવારે સવારે એક એવી હૃદયદ્રાવક ઘટના બની જેણે સમગ્ર શહેરને હચમચાવી દીધું છે. ઇન્ડિયન ઓઇલ કોર્પોરેશન (IOC) જેવા પ્રતિષ્ઠિત સંસ્થાનમાં એક્ઝિક્યુટિવ ડિરેક્ટર તરીકે ફરજ બજાવતા ૫૫ વર્ષીય અજય ગર્ગનું તેમના જ ફ્લેટના ૧૭મા માળેથી નીચે પટકાતા કરૂણ મૃત્યુ નીપજ્યું છે. સવારે ૧૦:૨૦ વાગ્યાની આસપાસ જ્યારે લોકો પોતપોતાના કામમાં વ્યસ્ત હતા, ત્યારે અચાનક થયેલા જોરદાર ધડાકાએ સોસાયટીના રહીશોને ચોંકાવી દીધા હતા. લોહીલુહાણ હાલતમાં જમીન પર પડેલા ગર્ગને જોઈને લોકો દોડી આવ્યા હતા, પરંતુ હોસ્પિટલ પહોંચે તે પહેલા જ તેમણે અંતિમ શ્વાસ લીધા હતા.

આ અકસ્માત પાછળનું કારણ એટલું સામાન્ય છતાં ગંભીર છે કે જે કોઈ પણ મોબાઈલ યુઝર સાથે બની શકે છે. મળતી માહિતી મુજબ, અજય ગર્ગ તેમના ફ્લેટમાં હતા ત્યારે અચાનક તેમના ફોનનું નેટવર્ક જતું રહ્યું હતું. મહત્વના કોલ કે સિગ્નલની શોધમાં તેઓ ઘરની બાલ્કનીમાં ગયા હતા. નેટવર્ક પકડવાના પ્રયાસમાં તેઓ રેલિંગ તરફ થોડા નમ્યા હોવાનું મનાય છે, જ્યાં અચાનક સંતુલન ગુમાવતા તેઓ ૧૭મા માળની ઊંચાઈએથી સીધા નીચે પટકાયા હતા. હાઈરાઈઝ બિલ્ડિંગોમાં મોબાઈલ સિગ્નલની સમસ્યા કેવી જીવલેણ સાબિત થઈ શકે છે, તેનું આ જીવંત અને કરુણ ઉદાહરણ છે.

પોલીસે ઘટનાસ્થળે પહોંચીને તપાસનો ધમધમાટ તેજ કર્યો છે. એટીએસ વન હેલ્મેટ સોસાયટીના સીસીટીવી ફૂટેજ ખંગાળવામાં આવી રહ્યા છે જેથી જાણી શકાય કે આ માત્ર અકસ્માત છે કે અન્ય કોઈ કારણ. મૂળ કાનપુરના રહેવાસી અજય ગર્ગ અહીં તેમની પત્ની સાથે રહેતા હતા. પત્નીની નજર સામે જ ઘરનો મોભી ચાલ્યો જતાં તેમનું આક્રંદ અટકવાનું નામ નથી લઈ રહ્યું. મુંબઈમાં રહેતા તેમના પુત્ર દેવાંગને તાત્કાલિક જાણ કરવામાં આવી છે અને તેના આવ્યા બાદ જ અંતિમ સંસ્કારની વિધિ કરવામાં આવશે. હાલમાં મૃતદેહને પોસ્ટમોર્ટમ માટે મોકલી આપવામાં આવ્યો છે.

આ ઘટનાએ હાઈરાઈઝ સોસાયટીઓમાં બાલ્કનીની સુરક્ષા અને મોબાઈલ નેટવર્ક પૂરા પાડતી કંપનીઓની સેવાઓ સામે પણ પ્રશ્નાર્થ ચિહ્નો ઉભા કર્યા છે. રહીશોમાં એ વાતની ચર્ચા છે કે જો નેટવર્ક પ્રોપર આવતું હોત તો કદાચ ગર્ગ સાહેબે બાલ્કનીમાં જીવના જોખમે જવું ન પડ્યું હોત. આ અકસ્માત બાદ ઈન્ડિયન ઓઈલ કોર્પોરેશનના અધિકારીઓમાં પણ શોકની લહેર છે, કારણ કે તેમણે એક બાહોશ અને અનુભવી સાથી ગુમાવ્યો છે. પોલીસ અત્યારે આ મામલે દરેક પાસા પર ઝીણવટભરી તપાસ કરી રહી છે.