કોલકાતા: ક્રિકેટ જગતમાં અત્યારે એક નવો અને ભયાનક વળાંક આવ્યો છે. ભારત અને પાકિસ્તાન વચ્ચેના તણાવથી તો દુનિયા વાકેફ હતી, પરંતુ હવે ભારત અને બાંગ્લાદેશ વચ્ચેના ક્રિકેટ સંબંધો પણ ઇતિહાસના સૌથી નીચલા સ્તરે પહોંચી ગયા છે. વિવાદનું કેન્દ્ર છે બાંગ્લાદેશનો સ્ટાર ફાસ્ટ બોલર મુસ્તફિઝુર રહેમાન. IPL 2026 માટે કોલકાતા નાઈટ રાઈડર્સ (KKR) એ તેને ₹9.20 કરોડની જંગી રકમમાં ખરીદ્યો હતો, પરંતુ BCCIના એક 'સિક્રેટ' નિર્દેશે આખી બાજી પલટી નાખી. ભારતમાં વધી રહેલા રાજકીય વિરોધ અને બાંગ્લાદેશમાં લઘુમતીઓ પર થતા કથિત અત્યાચારોના વિરોધમાં BCCIએ સ્પષ્ટ કર્યું કે મુસ્તફિઝુર આ વખતે IPL નહીં રમે. આ આદેશ બાદ KKRએ તેને રિલીઝ કરી દીધો છે, જેના પડઘા હવે સરહદ પાર ઢાકામાં જોરદાર રીતે પડી રહ્યા છે.
બાંગ્લાદેશની અંતરિમ સરકારના રમતગમત સલાહકાર આસિફ મહમૂદ નઝરુલે આ ઘટનાને બાંગ્લાદેશનું "રાષ્ટ્રીય અપમાન" ગણાવ્યું છે. સોશિયલ મીડિયા પર ગર્જના કરતા તેમણે લખ્યું કે, "જો ભારત એક ખેલાડીની સુરક્ષા નથી કરી શકતું, તો આખી ટીમને વર્લ્ડ કપ માટે ભારત મોકલવી એ જોખમ સમાન છે." તેમણે સ્પષ્ટ શબ્દોમાં કહ્યું છે કે "ગુલામીના દિવસો પૂરા થઈ ગયા છે." આ વિવાદના પગલે બાંગ્લાદેશ હવે પાકિસ્તાનના રસ્તે ચાલ્યું હોય તેમ લાગી રહ્યું છે, કારણ કે તેમણે ICC (ઇન્ટરનેશનલ ક્રિકેટ કાઉન્સિલ) ને લેખિતમાં માંગ કરી છે કે તેમની T20 વર્લ્ડ કપ 2026ની તમામ મેચો ભારતથી હટાવીને શ્રીલંકા શિફ્ટ કરવામાં આવે.
આ વિવાદની સૌથી મોટી અસર ફેબ્રુઆરીમાં યોજાનારા T20 વર્લ્ડ કપ પર પડી શકે છે. મૂળ શેડ્યૂલ મુજબ બાંગ્લાદેશની ત્રણ મહત્વની મેચો કોલકાતાના ઈડન ગાર્ડન્સમાં અને એક મેચ મુંબઈમાં રમાવાની છે. પરંતુ બાંગ્લાદેશ ક્રિકેટ બોર્ડ (BCB) હવે ભારતમાં પગ મૂકવા પણ તૈયાર નથી. જો ICC આ માંગણી નહીં સ્વીકારે તો બાંગ્લાદેશ વર્લ્ડ કપનો બહિષ્કાર પણ કરી શકે છે. બીજી તરફ, બાંગ્લાદેશમાં IPLના પ્રસારણ પર પ્રતિબંધ મૂકવાની પણ તૈયારીઓ થઈ ગઈ છે. આ સ્થિતિ જોતા લાગે છે કે 2008માં જેમ પાકિસ્તાની ખેલાડીઓ માટે IPL ના દરવાજા બંધ થયા હતા, તેમ હવે બાંગ્લાદેશી ખેલાડીઓનું ભવિષ્ય પણ અંધકારમાં ધકેલાઈ ગયું છે.
ક્રિકેટ પંડિતો માની રહ્યા છે કે આ વિવાદ માત્ર રમત પૂરતો સીમિત નથી, પરંતુ બે દેશો વચ્ચેના બદલાતા ભૌગોલિક-રાજકીય સમીકરણોનું પરિણામ છે. KKR ના માલિક શાહરુખ ખાન પર પણ ભારતીય રાજકીય સંગઠનોનું દબાણ હતું કે તેઓ બાંગ્લાદેશી ખેલાડીને ટીમમાં ન રાખે. હવે દડો ICC ના કોર્ટમાં છે. જો વર્લ્ડ કપના સ્થળો બદલાશે તો ભારત માટે આ એક મોટો આંચકો હશે, અને જો નહીં બદલાય તો બાંગ્લાદેશની ગેરહાજરી ટુર્નામેન્ટની ચમક ઓછી કરી શકે છે. હાલ તો ક્રિકેટ પ્રેમીઓ શ્વાસ અધ્ધર કરીને બેઠા છે કે 'જેન્ટલમેન ગેમ' ગણાતી આ રમત રાજકારણના અખાડામાં કેવી રીતે જીતશે.