નવી દિલ્હી:  વર્ષ ૨૦૨૦માં ઉત્તર-પૂર્વ દિલ્હીમાં ફાટી નીકળેલા ભીષણ રમખાણોના કાવતરા સાથે જોડાયેલા કેસમાં આજે સુપ્રીમ કોર્ટે ખૂબ જ મહત્વનો ચુકાદો આપ્યો છે. દેશની સર્વોચ્ચ અદાલતે સામાજિક કાર્યકર ઉમર ખાલિદ અને શરજીલ ઈમામની જામીન અરજીઓ ફગાવી દીધી છે. કોર્ટે સ્પષ્ટ કર્યું હતું કે, આ બંને આરોપીઓ વિરુદ્ધ ગેરકાનુની પ્રવૃત્તિઓ નિવારણ અધિનિયમ (UAPA) હેઠળ પ્રથમ દૃષ્ટિએ કેસ બને છે, તેથી તેમને મુક્ત કરી શકાય નહીં.
 જામીન ન મળ્યા બાદ ઉમર ખાલિદની પ્રતિક્રિયા સામે આવી છે. તેણે ભાવુક થતા કહ્યું, "હવે જેલ જ મારી જિંદગી બની ગઈ છે. મને દુઃખ છે કે મને રાહત ન મળી, પરંતુ આ જ કેસમાં અન્ય પાંચ આરોપીઓને જામીન મળ્યા છે તે જોઈને મને ખુશી છે." આ કેસમાં દિલ્હી પોલીસે દલીલ કરી હતી કે ઉમર ખાલિદ અને શરજીલ ઈમામ રમખાણોના મુખ્ય કાવતરાખોરોમાં સામેલ હતા અને તેમના ભાષણોએ હિંસા ભડકાવવામાં મોટી ભૂમિકા ભજવી હતી.
 સુપ્રીમ કોર્ટે પોલીસ દ્વારા રજૂ કરવામાં આવેલા પુરાવાઓ અને સાક્ષીઓના નિવેદનોને ધ્યાને રાખીને આ નિર્ણય લીધો છે.
કોર્ટે નોંધ્યું કે UAPA હેઠળ જ્યારે ગંભીર આરોપો હોય અને પોલીસ ડાયરીમાં પૂરતા પુરાવા હોય, ત્યારે જામીન મળવા મુશ્કેલ હોય છે.
 દિલ્હી પોલીસની ચાર્જશીટ મુજબ, આ રમખાણો અચાનક નહોતા થયા પણ તે પૂર્વ આયોજિત કાવતરું હતું, જેમાં આ બંનેની ભૂમિકા મહત્વની હતી.
 ચુકાદાની બીજી બાજુએ, આ જ કેસમાં સંડોવાયેલા અન્ય પાંચ સહ-આરોપીઓને સુપ્રીમ કોર્ટે જામીન પર મુક્ત કરવાનો આદેશ આપ્યો છે. કોર્ટના મતે, આ પાંચેય સામેના પુરાવાઓ ઉમર અને શરજીલ જેટલા ગંભીર જણાતા નથી. આ નિર્ણય બાદ આરોપીઓના પરિવારોમાં ક્યાંક ખુશી તો ક્યાંક ગમનો માહોલ જોવા મળ્યો હતો. આ કેસના કારણે રાજકીય અને સામાજિક વર્તુળોમાં ફરી એકવાર ગરમાવો આવી ગયો છે. હવે આગામી સુનાવણીમાં બચાવ પક્ષ કયા નવા પુરાવા રજૂ કરે છે તેના પર સૌની નજર રહેશે.