નવી દિલ્હી:  દેશના કરોડો ખાનગી કર્મચારીઓ માટે રાહતના સમાચાર આવી રહ્યા છે. સુપ્રીમ કોર્ટે કેન્દ્ર સરકાર અને કર્મચારી ભવિષ્ય નિધિ સંગઠન (EPFO) ને સ્પષ્ટ આદેશ આપ્યો છે કે તેઓ આગામી ચાર મહિનાની અંદર 'વેતન મર્યાદા' (Wage Ceiling) માં સુધારા અંગે અંતિમ નિર્ણય લે. આ નિર્ણયથી લાખો કર્મચારીઓના પીએફ કવરેજ અને હાથમાં આવતા પગાર પર મોટી અસર પડી શકે છે.
 હાલના નિયમ મુજબ, જે કર્મચારીનો મૂળ પગાર (Basic Pay) દર મહિને ₹15,000 સુધી છે, તેમના માટે EPF યોજનામાં સામેલ થવું ફરજિયાત છે. આ મર્યાદા છેલ્લે સપ્ટેમ્બર 2014 માં નક્કી કરવામાં આવી હતી અને છેલ્લા 11 વર્ષથી તેમાં કોઈ ફેરફાર થયો નથી. ડૉ. નવીન પ્રકાશ નૌટિયાલ દ્વારા દાખલ કરવામાં આવેલી અરજીમાં દલીલ કરવામાં આવી હતી કે, આજના મોંઘવારીના જમાનામાં ₹15,000 ની મર્યાદા અતાર્કિક છે, કારણ કે આનાથી થોડો પણ વધુ પગાર ધરાવતા કર્મચારીઓ સામાજિક સુરક્ષાના લાભોથી વંચિત રહી જાય છે.
 જસ્ટિસ જે.કે. મહેશ્વરી અને અતુલ એસ. ચાંદુરકરની બેન્ચે આ મામલે સુનાવણી કરતા જણાવ્યું કે, જો નીચલા સ્તરના કર્મચારીઓને જ કલ્યાણકારી યોજનાઓનો લાભ ન મળે, તો સામાજિક સુરક્ષાનો મૂળ હેતુ જ નિષ્ફળ જાય છે. ઉલ્લેખનીય છે કે, વર્ષ 2022 માં જ સેન્ટ્રલ બોર્ડ ઓફ ટ્રસ્ટીઝે આ મર્યાદા વધારવાની ભલામણને મંજૂરી આપી દીધી હતી, પરંતુ કેન્દ્ર સરકાર અત્યાર સુધી તેના પર મૌન સેવીને બેઠી હતી.
 નિષ્ણાતોનું માનવું છે કે સુપ્રીમ કોર્ટના દબાણ બાદ સરકાર આ મર્યાદા વધારીને ₹21,000 અથવા ₹25,000 કરી શકે છે. જો આવું થશે તો:
લાખો નવા કર્મચારીઓ EPFO ના દાયરામાં આવશે.
કર્મચારીઓના નિવૃત્તિ ભંડોળ (PF Corpus) માં વધારો થશે.
કંપનીઓનો પીએફ ફાળો પણ વધશે, જેનાથી લાંબા ગાળે કર્મચારીઓને મોટો ફાયદો થશે.
હવે જોવાનું એ રહેશે કે સુપ્રીમ કોર્ટે આપેલા ચાર મહિનાના સમયગાળામાં કેન્દ્ર સરકાર કર્મચારીઓના હિતમાં કેવો મોટો નિર્ણય લે છે