નવી દિલ્હી:  દેશની સૌથી મોટી જાહેર ક્ષેત્રની બેંક, સ્ટેટ બેંક ઓફ ઈન્ડિયાના કરોડો ગ્રાહકો પર અત્યારે સાયબર હુમલાનું જોખમ તોળાઈ રહ્યું છે. છેલ્લા કેટલાક દિવસોથી ઘણા ગ્રાહકોના WhatsApp પર એક ભયાનક મેસેજ વાયરલ થઈ રહ્યો છે, જેમાં દાવો કરવામાં આવ્યો છે કે જો તમે તાત્કાલિક તમારો આધાર કાર્ડ અપડેટ નહીં કરો, તો તમારી લોકપ્રિય 'YONO' મોબાઈલ એપ કાયમી ધોરણે બ્લોક કરી દેવામાં આવશે. આ મેસેજની સાથે એક અજાણી APK ફાઈલ પણ મોકલવામાં આવી રહી છે, જેને ઇન્સ્ટોલ કરવાનું દબાણ કરવામાં આવે છે. વાસ્તવમાં આ કોઈ સત્તાવાર મેસેજ નથી, પરંતુ સાયબર અપરાધીઓ દ્વારા બિછાવવામાં આવેલી એક જાળ છે.

SBI એ આ મામલે ગંભીર નોંધ લેતા પોતાના ગ્રાહકો માટે સત્તાવાર ચેતવણી જાહેર કરી છે. બેંકે સ્પષ્ટ કર્યું છે કે તે ક્યારેય ગ્રાહકોને WhatsApp પર કોઈ લિંક કે APK ફાઈલ મોકલીને વ્યક્તિગત વિગતો માંગતી નથી. જો કોઈ ગ્રાહક ભૂલથી પણ આ ફાઈલ ડાઉનલોડ કરે છે, તો તેના ફોનનો સંપૂર્ણ કંટ્રોલ હેકર્સ પાસે જઈ શકે છે. આ મિલીશિયસ સોફ્ટવેર તમારા ફોનમાંથી બેંકિંગ પાસવર્ડ અને OTP ચોરી લે છે, જેનાથી ગણતરીની મિનિટોમાં જ આખું બેંક એકાઉન્ટ ખાલી થઈ શકે છે. બેંકે સલાહ આપી છે કે આવા કોઈપણ શંકાસ્પદ WhatsApp એકાઉન્ટને તાત્કાલિક રિપોર્ટ અને બ્લોક કરો.

PIB ફેક્ટ ચેકે પણ આ વાયરલ મેસેજની તપાસ કર્યા બાદ તેને નકલી જાહેર કર્યો છે. સરકારી એજન્સીએ લોકોને અપીલ કરી છે કે ડરવાની જરૂર નથી, કારણ કે આધાર અપડેટ ન થવાને કારણે બેંક એપ બ્લોક થતી નથી. કોઈપણ એપ્લિકેશનને હંમેશા અધિકૃત Google Play Store અથવા Apple App Store પરથી જ ડાઉનલોડ કરવી જોઈએ. અજાણ્યા સ્ત્રોત દ્વારા મોકલવામાં આવેલી કોઈપણ ફાઈલ તમારા ડિજિટલ જીવન અને જીવનભરની કમાણી માટે જોખમી સાબિત થઈ શકે છે. 'સાવચેતી એ જ સલામતી'ના મંત્રને અનુસરીને ગ્રાહકોએ જાગૃત રહેવાની જરૂર છે.

જો તમને પણ આવો કોઈ મેસેજ મળ્યો હોય અથવા તમારા ખાતામાંથી અજાણી લેવડદેવડ થઈ હોય, તો વિલંબ કર્યા વિના નેશનલ સાયબર ક્રાઈમ હેલ્પલાઈન નંબર '1930' પર કોલ કરો અથવા અધિકૃત સાયબર ક્રાઈમ પોર્ટલ પર ફરિયાદ નોંધાવો. બેંકિંગ વ્યવહારો માટે હંમેશા સત્તાવાર વેબસાઈટનો જ ઉપયોગ કરો અને તમારા મોબાઈલમાં એન્ટી-વાયરસ સોફ્ટવેર રાખવાનો આગ્રહ રાખો. યાદ રાખો કે બેંક ક્યારેય તમારી પાસે ફોન કે મેસેજ દ્વારા ગુપ્ત પિન કે પાસવર્ડ માંગતી નથી.