બર્મિંગહામ, તા.૦૭ : ભારતની ઉભરતી સ્ક્વોશ સ્ટાર અને ટોચની ક્રમાંકિત ખેલાડી અનાહત સિંહે ઈંગ્લેન્ડમાં રમાયેલી પ્રતિષ્ઠિત 'બ્રિટિશ જુનિયર ઓપન સ્ક્વોશ ચેમ્પિયનશિપ'માં પોતાની પ્રતિભાનો પરચો આપતા મહિલા અંડર-19 કેટેગરીમાં સિલ્વર મેડલ હાંસલ કર્યો છે. આંતરરાષ્ટ્રીય સ્તરે સ્ક્વોશમાં ભારતનું નામ રોશન કરનાર અનાહતે આખી ટૂર્નામેન્ટ દરમિયાન શાનદાર પ્રદર્શન કર્યું હતું.
બર્મિંગહામ યુનિવર્સિટી ખાતે રમાયેલી અત્યંત રોમાંચક ફાઈનલ મેચમાં અનાહત સિંહનો મુકાબલો ફ્રાન્સની લોરેન બાલ્ટાયન સામે થયો હતો. બંને ખેલાડીઓ વચ્ચે ખરાખરીનો જંગ જામ્યો હતો, જેમાં સ્કોરબોર્ડ સતત ઉપર-નીચે થતું રહ્યું હતું. અનાહતે પ્રથમ ગેમ ગુમાવ્યા બાદ બીજી ગેમમાં 11-7થી શાનદાર વાપસી કરી હતી. જોકે, ફ્રેન્ચ ખેલાડીએ વળતો પ્રહાર કરતા અંતે અનાહત 9-11, 11-7, 3-11, 9-11 થી પરાજિત થઈ હતી. આ હાર છતાં અનાહતે મેદાનમાં બતાવેલી રમત અને જુસ્સાએ સૌના દિલ જીતી લીધા હતા.
ઉલ્લેખનીય છે કે, અનાહત સિંહે સેમિફાઈનલમાં ઇજિપ્તની મલિકા અલ કારાક્સી સામે પ્રભુત્વશાળી વિજય મેળવીને ફાઈનલમાં પોતાની જગ્યા પાકી કરી હતી. અનાહત સિંહની આ સિદ્ધિ ભારતીય સ્ક્વોશ માટે ખૂબ જ મહત્વની માનવામાં આવે છે, કારણ કે તે સતત વૈશ્વિક મંચ પર મેડલ જીતીને દેશની શાન વધારી રહી છે. રમતગમત ક્ષેત્રના દિગ્ગજોએ અનાહતને તેના આ શાનદાર પ્રદર્શન અને સિલ્વર મેડલ જીતવા બદલ અભિનંદન પાઠવ્યા છે.