મુંબઈ : શેરબજારમાં જ્યારે ચોક્કસ શેરોની ચર્ચા દરેકના હોઠ પર હોય, ત્યારે રોકાણકારો ઘણીવાર આંધળી દોટ મૂકતા હોય છે. પરંતુ હાલમાં બજારના બે મોટા મહારથીઓ - જુબિલન્ટ ફૂડવર્ક્સ અને ઇન્ડસઇન્ડ બેંક (IndusInd Bank) વિશે આવેલા સમાચાર રોકાણકારોના પોર્ટફોલિયોમાં ધરતીકંપ લાવી શકે છે. વિશ્વની પ્રતિષ્ઠિત બ્રોકરેજ ફર્મ્સ CLSA અને JP મોર્ગને આ બંને શેર પર નકારાત્મક રિપોર્ટ જાહેર કરીને 'સેલ' અને 'અંડરપર્ફોર્મ' ના રેટિંગ આપ્યા છે.
ભારતમાં ડોમિનોઝ પિઝા અને ડંકિન ડોનટ્સનું સંચાલન કરતી જુબિલન્ટ ફૂડવર્ક્સના ત્રીજા ક્વાર્ટરના આંકડા અપેક્ષા કરતા ઘણા નબળા રહ્યા છે. બજારને આશા હતી કે કંપની ૧૨-૧૩% ની વૃદ્ધિ નોંધાવશે, પરંતુ કંપની માત્ર ૧૧.૮% પર જ અટકી ગઈ છે. ડોમિનોઝના જૂના સ્ટોર્સમાં ગ્રાહકોનો ધસારો પણ ઘટ્યો છે. આ સ્થિતિને જોતા CLSA એ આ શેરનો ટાર્ગેટ ભાવ ઘટાડીને ₹૪૭૭ કરી દીધો છે, જે વર્તમાન ભાવથી ઘણો નીચે છે.
બીજી તરફ, બેંકિંગ ક્ષેત્રની જાણીતી ઇન્ડસઇન્ડ બેંકની હાલત પણ કફોડી દેખાઈ રહી છે. બેંકના લોન વિતરણમાં વાર્ષિક ધોરણે ૧૩.૧% નો મોટો ઘટાડો થયો છે, જે બેંકની આવક માટે મોટું જોખમ છે. આ ઉપરાંત, બેંક પાસે રહેલા સસ્તા ભંડોળ એટલે કે CASA રેશિયોમાં પણ મોટો ઘટાડો નોંધાયો છે. JP મોર્ગને આ નબળા આંકડાઓને પગલે બેંકના શેરનો લક્ષ્યાંક ભાવ ₹૭૩૫ થી ઘટાડીને ₹૭૦૬ કરી દીધો છે. નિષ્ણાતોના મતે, આ બંને શેરોમાં હાલમાં જોખમ વધારે છે અને રોકાણકારોએ ઉતાવળ કરવાને બદલે સાવચેતી રાખવી જોઈએ.