વોશિંગ્ટન: અમેરિકાના રક્ષા મંત્રી (સેક્રેટરી ઓફ ડિફેન્સ/વોર) પીટ હેગસેથે સેનેટર અને પૂર્વ નેવી કેપ્ટન માર્ક કેલીને સત્તાવાર 'લેટર ઓફ સેન્સર' પાઠવ્યો છે. કેલી પર સૈનિકોને 'ગેરકાયદેસર આદેશો' ન માનવા માટે ઉશ્કેરવાનો અને સૈન્ય નેતૃત્વ પર યુદ્ધ અપરાધોનો આરોપ મૂકવાનો ગંભીર આરોપ છે.

તારીખ ૫ જાન્યુઆરી ૨૦૨૬ ના રોજ લખાયેલા એક સત્તાવાર પત્રમાં, અમેરિકાના રક્ષા મંત્રી પીટ હેગસેથે ડેમોક્રેટ સેનેટર અને નાસાના પૂર્વ અવકાશયાત્રી માર્ક કેલી સામે કડક કાર્યવાહી કરી છે. હેગસેથે કેલીને તેમના વર્તન બદલ ઠપકો આપતો પત્ર (સેન્સર લેટર) ઇશ્યુ કર્યો છે.

​આ વિવાદનું મુખ્ય કારણ નવેમ્બર ૨૦૨૫ માં પ્રસિદ્ધ થયેલો એક વીડિયો છે જેનું શીર્ષક "ડોન્ટ ગીવ અપ ધ શીપ" (જહાજ છોડશો નહીં) હતું. આ વીડિયોમાં માર્ક કેલી અને અન્ય નેતાઓએ સૈનિકોને કહ્યું હતું કે તેમણે બંધારણ હેઠળ 'ગેરકાયદેસર આદેશો' માનવાની જરૂર નથી. રક્ષા મંત્રીએ આરોપ મૂક્યો છે કે કેલીએ કાયદેસરના મિલિટરી ઓપરેશન્સને ગેરકાયદેસર ગણાવીને સૈનિકોમાં ગેરસમજ અને શિસ્તભંગ ઊભો કરવાનો પ્રયાસ કર્યો છે.

​પત્રમાં જણાવાયું છે કે, કેલીએ વરિષ્ઠ લશ્કરી અધિકારીઓ પર 'યુદ્ધ અપરાધો' કર્યા હોવાના જાહેરમાં આક્ષેપો કર્યા છે, જે એક અધિકારી તરીકે તેમને શોભતું નથી. આ ઉપરાંત, પીટ હેગસેથે આદેશ આપ્યો છે કે નેવી વિભાગ સાથે મળીને તપાસ કરવામાં આવે કે શું માર્ક કેલીનો નિવૃત્ત 'કેપ્ટન' તરીકેનો રેન્ક ઘટાડી શકાય કે કેમ. આ પત્ર કેલીની સત્તાવાર મિલિટરી ફાઈલમાં પણ મૂકવામાં આવશે.