નવી દિલ્હી: દુનિયાના સૌથી ધનિક વ્યક્તિ અને ટેસ્લા-સ્પેસએક્સના માલિક એલોન મસ્ક હંમેશા તેમના અનોખા નિર્ણયો અને બાળકોના વિચિત્ર નામોને લીધે ચર્ચામાં રહે છે. પરંતુ આ વખતે તેમણે પોતાના પુત્રના નામ પાછળના જે કારણો જણાવ્યા છે, તેણે ભારતીયોનું દિલ જીતી લીધું છે. મસ્કે ખુલાસો કર્યો છે કે તેમના પુત્રના નામમાં રહેલું 'શેખર' નામ ભારત માટે ગૌરવ સમાન એક મહાન ભૌતિકશાસ્ત્રીની પ્રેરણા છે.

કોણ છે એ 'શેખર'?

સોશિયલ મીડિયા પ્લેટફોર્મ X પર મસ્કે જણાવ્યું કે તેમના પુત્રનું પૂરું નામ સ્ટ્રાઇડર શેખર (Strider Sekhar) છે. આ નામમાં 'શેખર' મધ્યમ નામ ભારતીય-અમેરિકન ખગોળ ભૌતિકશાસ્ત્રી સુબ્રમણ્યમ ચંદ્રશેખરના સન્માનમાં રાખવામાં આવ્યું છે. ચંદ્રશેખરે તારાઓની ઉત્ક્રાંતિ પરના સંશોધન માટે ભૌતિકશાસ્ત્રમાં નોબેલ પુરસ્કાર જીત્યો હતો. મસ્કની સ્પેસએક્સ કંપની બ્રહ્માંડના રહસ્યો શોધે છે, ત્યારે નોબેલ વિજેતા ભારતીય વૈજ્ઞાનિકનું નામ પોતાના પુત્રને આપવું એ મસ્કનો વિજ્ઞાન પ્રત્યેનો આદર દર્શાવે છે.

કાલ્પનિક હીરો અને વિડીયો ગેમમાંથી લીધા છે નામ:

મસ્કના બાળકોના નામ માત્ર વિજ્ઞાન જ નહીં પણ કાલ્પનિક દુનિયા સાથે પણ જોડાયેલા છે:

· સ્ટ્રાઇડર: લોકપ્રિય ફિલ્મ 'ધ લોર્ડ ઓફ ધ રિંગ્સ' ના મહાન પાત્ર 'એરાગોર્ન' પરથી લેવામાં આવ્યું છે, જે સ્ટ્રાઇડર તરીકે પણ ઓળખાય છે.

· કોમેટ એઝ્યુર: તેમની પુત્રીનું નામ 'એલ્ડેન રિંગ' નામની પ્રખ્યાત વિડીયો ગેમના સૌથી શક્તિશાળી જાદુ (Spell) પરથી પ્રેરિત છે.

મસ્ક અને શિવોન ઝિલિસના જોડિયા બાળકો:

આ જોડિયા બાળકોનો જન્મ નવેમ્બર 2021 માં મસ્ક અને ન્યુરાલિંકની એક્ઝિક્યુટિવ શિવોન ઝિલિસને ત્યાં IVF દ્વારા થયો હતો. અત્યાર સુધી દુનિયા તેમને માત્ર ટૂંકા નામો સ્ટ્રાઇડર અને એઝ્યુરથી જ જાણતી હતી, પરંતુ 8 જાન્યુઆરી, 2026 ના રોજ મસ્કે પોતે જ તેમના સંપૂર્ણ નામ જાહેર કરી સૌને આશ્ચર્યમાં મૂકી દીધા છે.

મસ્કનો પોતાના બાળકોને અપરંપરાગત નામ આપવાનો ઇતિહાસ જૂનો છે. અગાઉ તેમણે સંગીતકાર ગ્રીમ્સ સાથેના બાળકોના નામ 'X Æ A-Xii' અને 'ટેકનો મિકેનિકસ' જેવા રાખ્યા હતા. જોકે, પુત્રના નામમાં ભારતીય વૈજ્ઞાનિકના નામનો સમાવેશ થતાં ભારતીય ચાહકોમાં આ વાત અત્યારે ખૂબ જ વાયરલ થઈ રહી છે.