નવી દિલ્હી:  ભારતીય અર્થતંત્ર માટે સૌથી મહત્વનો ગણાતો 'બજેટ ઉત્સવ' હવે નજીક આવી રહ્યો છે. સંસદીય બાબતોની કેબિનેટ સમિતિએ વર્ષ 2026ના બજેટ સત્રનું કામચલાઉ સમયપત્રક તૈયાર કરી લીધું છે, જે મુજબ 28 જાન્યુઆરીથી લોકશાહીના મંદિર સમાન સંસદ ભવનમાં કાર્યવાહી શરૂ થશે. આ દિવસે રાષ્ટ્રપતિ દ્રૌપદી મુર્મુ લોકસભા અને રાજ્યસભાની સંયુક્ત બેઠકને સંબોધિત કરીને સરકારની આગામી પ્રાથમિકતાઓનો રોડમેપ રજૂ કરશે. ખાસ વાત એ છે કે આ વખતે 1 ફેબ્રુઆરીએ રવિવાર હોવા છતાં, પરંપરા મુજબ નાણામંત્રી નિર્મલા સીતારમણ કેન્દ્રીય બજેટ રજૂ કરીને સામાન્ય જનતાની અપેક્ષાઓ પર ખરા ઉતરવાનો પ્રયાસ કરશે.

સત્રના શિડ્યુલ મુજબ, 29 જાન્યુઆરીએ 'બીટિંગ રિટ્રીટ' સમારોહ હોવાથી સંસદની કાર્યવાહી મોકૂફ રહેશે, ત્યારબાદ 30 જાન્યુઆરીએ દેશનું 'આર્થિક સર્વેક્ષણ' રજૂ કરવામાં આવશે. આ દસ્તાવેજ દેશની આર્થિક તબિયતનો ચિતાર આપશે કે આપણે વિકાસના પથ પર કેટલા આગળ વધ્યા છીએ. બજેટ રજૂ થયા બાદ વિવિધ મંત્રાલયોની ગ્રાન્ટની માંગણીઓ પર ચર્ચા કરવા માટે 13 ફેબ્રુઆરીથી સંસદમાં એક મહિનાનો વિરામ લેવામાં આવશે, જે દરમિયાન સ્ટેન્ડિંગ કમિટીઓ બજેટની દરખાસ્તોનું ઝીણવટભર્યું નિરીક્ષણ કરશે.

સત્રનો બીજો તબક્કો 9 માર્ચથી શરૂ થશે અને 2 એપ્રિલે તેની પૂર્ણાહુતિ થશે. આ વખતે બજેટમાં મોંઘવારી પર કાબૂ મેળવવા, રોજગારીની નવી તકો ઉભી કરવા અને ઈન્ફ્રાસ્ટ્રક્ચર પાછળ જંગી રોકાણ કરવા પર ધ્યાન કેન્દ્રિત કરવામાં આવે તેવી સંભાવના છે. ખાસ કરીને આવકવેરાના સ્લેબમાં ફેરફાર થશે કે કેમ, તે જોવા માટે મધ્યમ વર્ગ મીટ માંડીને બેઠો છે. રાજકીય રીતે પણ આ સત્ર તોફાની બની શકે છે કારણ કે વિપક્ષ અનેક મુદ્દાઓ પર સરકારને ઘેરવાની તૈયારીમાં છે.