તા. ૪ નવેમ્બરે ર૦ર૫ વિક્રમ સંવત ર૦૮૨ કારતક સુદ – ૧૪ મંગળવાર
વાયબ્રન્ટમાં કાલે નરેન્દ્રભાઇના હસ્તે પાંચ દિવસીય બિઝનેસ એકિઝબિશન ખૂલ્લૂ મૂકાશે
લોકલ કારીગરથી માંડી ગ્લોબલ માર્કેટમાં ડંકો વગાડતી કંપનીઓની ક્ષમતા જોવા મળશે...
રાજકોટઃ ‘વાઇબ્રન્ટ ગુજરાત રિજનલ કોન્ફરન્સ'માં એક તરફ દેશ-વિદેશના પ્રતિનિધિઓ વચ્ચે બી-ટુ-બી ડીલ ચાલતી હશે, બીજી તરફ બિઝનેસ એક્ઝિબિશનમાં ‘લોકલ' કારીગરથી લઈને ‘ગ્લોબલ' માર્કેટમાં ડંકો વગાડતી ભારતીય કંપનીઓની ક્ષમતાથી મુલાકાતીઓ અવગત થતા હશે. આમ ‘વી.જી.આર.સી.' ખરા અર્થમાં ‘ક્ષેત્રીય આકાંક્ષાઓ સાથે વૈશ્વિક મહત્વકાંક્ષા' ના સમન્વયનો મંચ બનશે.
વડાપ્રધાન શ્રી નરેન્દ્રભાઈ મોદી ૧૧મી જાન્યુઆરીએ મારવાડી યુનિવર્સિટી ખાતે ‘વાઇબ્રન્ટ ગુજરાત રિજનલ કોન્ફરન્સ'ની સાથે ‘વાઇબ્રન્ટ ગુજરાત રિજનલ એક્ઝિબિશન'નું પણ ઉદ્ધાટન કરશે. ‘VGR-કોન્ફરન્સ' બે દિવસ ચાલશે જ્યારે ‘VGR-એક્ઝિબિશન' ૧૫મી જાન્યુઆરી સુધી ખુલ્લું રહેશે.
આ એક્ઝિબિશનમાં ૧૮ હજાર ચોરસ મીટર જગ્યામાં વિશાળ ડોમમાં છ થીમ પેવેલિયન બનાવવામાં આવ્યા છે. જેમાં વિવિધ ક્ષેત્રોના ભવિષ્યની તકોને ઉજાગર કરતી વિવિધ બાબતો રજૂ કરવામાં આવનાર છે.
હોલ નં. ૦૧ માં ‘ગેટવે ટુ ગ્લોબલ ગ્રોથ'ની થીમ સાથે પ્રદર્શન રાખવામાં આવ્યું છે. જેમાં જાપાનની જેટ્રો (જાપાન એક્સટર્નલ ટ્રેડ ઓર્ગેનાઇઝેશન), ઉદ્યોગ અને ખાણ વિભાગ-ગુજરાત સરકાર, ગુજરાત ઈન્ફ્રાસ્ટ્રક્ચર ડેવલપમેન્ટ બોર્ડ, ધોલેરા સર, ગુજરાત માઇન્સ ડેવલપમેન્ટ કોર્પોરેશન, એસ.બી.આઈ., ગુજરાત ટૂરિઝમ, મિનિસ્ટ્રી ઓફ ટૂરિઝમ-ભારત સરકાર વગેરેના આકર્ષક સ્ટોલમાં વિવિધ વિગતો જાણવા મળશે. અહીં બિઝનેસ ટુ બિઝનેસ મિટિંગ માટે રિવર્સ બાયર્સ-સેલર્સ મીટ પણ થશે.
હોલ નં. ૦૨ માં ‘ગ્રીન એનર્જી ઈકો સિસ્ટમ અને પેટ્રોકેમિકલ્સ'ની થીમ સાથે પ્રદર્શન યોજવામાં આવ્યું છે. અહીં ટોરેન્ટ પાવર, પિક્સોન કંપની, પેરામાઉન્ટ, સનીફાઈ, રેડરેન સોલાર, કોસોલ વગેરેના સ્ટોલ્સમાં એનર્જી સેક્ટર અને ગ્રીન એનર્જી સંલગ્ન વિવિધ બાબતો રજૂ કરવામાં આવશે.
હોલ નં. ૦૩ માં ‘હસ્તકલા ગ્રામ્ય અને એમ.એસ.એમ.ઈ.' થીમનુ પ્રદર્શન રાખવામાં આવ્યું છે. અહીં ગુજરાત નર્મદા વેલી ફર્ટિલાઈઝર, ગૌ યોગ કેન્દ્ર, સિગ્નસ મોટર્સ વગેરેના સ્ટોલ રાખવામાં આવ્યા છે. ઉપરાંત ‘વોકલ ફોર લોકલ'ને પ્રોત્સાહન આપવા સ્વદેશી હાટ અંતર્ગત વિવિધ સ્ટોલ્સ, ગુજરાત ગ્રીન રિવોલ્યુશન કંપની લિમિટેડ, વિઝન એનર્જી વગેરેના સ્ટોલ્સ રાખવામાં આવ્યા છે.
હોલ નં. ૦૪ માં ‘ઓશન ઓફ ઓપોર્ચ્યુનિટીઝ' (અવસરોનો મહાસાગર)ની થીમ સાથે પ્રદર્શન યોજવામાં આવ્યું છે. જેમાં ગુજરાત મેરિટાઈમ બોર્ડ દ્વારા એક મોટા જહાજમાં બંદર અને સમુદ્રી ક્ષેત્રના વિકાસની તકોનું નિદર્શન કરવામાં આવશે. ઉપરાંત અહીં રિલાયન્સ ન્યૂ એનર્જી, રિલાયન્સ ઈન્ડસ્ટ્રીઝ, વન્ય પ્રાણીઓના રાહત-બચાવ માટે કાર્યરત વનતારા, ગુજરાત મેરિટાઈમ યુનિવર્સિટી, ગણપત યુનિવર્સિટી, શ્રી રામ એરોસ્પેસ, એસ.એલ.એસ., યુનિક ફોર્જ, વી.વી.પી. એન્જિનિયરિંગ વગેરેના સ્ટોલ્સ રાખવામાં આવ્યા છે. હોલ નં. ૦૫ માં ‘એન્ટરપ્રાઈઝ એક્સેલન્સ પેવેલિયન'ની થીમ સાથે પ્રદર્શન યોજવામાં આવ્યું છે. અહીં ભારતની મહારત્ન કંપની હિન્દુસ્તાન એરોનોટિક્સ લિમિટેડ, એસ્સાર, ન્યારા એનર્જી, જ્યોતી સી.એન.સી., એરપોર્ટ ઓથોરિટી ઓફ ઈન્ડિયા, ભારતીય શેરબજાર અને સંલગ્ન ઓથોરિટી, નિરમા, બેન્ક ઓફ બરોડા, જે.કે. ટાયર્સ સહિતના મોટા સ્ટોલ્સ છે.હોલ નં. ૦૬ માં ‘પબ્લિક સેક્ટર પાવર હાઉસ'માં રાજ્યના શિક્ષણ વિભાગ, ગુજરાત રાજ્ય ડિઝાસ્ટર મેનેજમેન્ટ ઓથોરિટી, ગુજરાત પ્રદૂષણ નિયંત્રણ બોર્ડ, ગુજરાત એનર્જી ડેવલપમેન્ટ એજન્સી, ગુજરાત પર્યાવરણ પ્રબંધન સંસ્થાન (ગેમી), નેશનલ હાઈવે ઓથોરિટી ઓફ ઈન્ડિયા, વન વિભાગ-ગુજરાત રાજ્યના સ્ટોલ્સ રાખવામાં આવ્યા છે.
(3:57 PM IST)
છેલ્લા 8 દિવસમાં સૌથી લોકપ્રિય 
