નવી દિલ્‍હી, તા.૧૦: સુપ્રીમ કોર્ટે બાળ જાતીય શોષણ સાથે સંકળાયેલા POCSO (જાતીય અપરાધ નિવારણ) કાયદાના દુરુપયોગ પર ચિંતા વ્‍યક્‍ત કરી છે. કોર્ટે કેન્‍દ્ર સરકારને આ સમસ્‍યાનો ઉકેલ લાવવા માટે ‘રોમિયો-જુલિયટ કલમ‘ જેવી જોગવાઈ દાખલ કરવાનો નિર્દેશ આપ્‍યો છે. આનો અર્થ એ છે કે સાચા કિશોર પ્રેમ સંબંધોને આ કાયદાની કડક જોગવાઈઓમાંથી મુક્‍તિ આપી શકાય છે. સુપ્રીમ કોર્ટે એમ પણ કહ્યું કે જામીન આપતી વખતે ઉચ્‍ચ અદાલતો પીડિતાની ઉંમર નક્કી કરવા માટે તબીબી પરીક્ષણનો આદેશ આપી શકતી નથી.

આ નિર્ણય અલ્‍હાબાદ હાઇકોર્ટના આદેશને ઉથલાવી દેતી વખતે આપવામાં આવ્‍યો હતો. સુપ્રીમ કોર્ટની બેન્‍ચમાં ન્‍યાયાધીશ સંજય કરોલ અને એન. કોટીશ્વર સિંહનો સમાવેશ થાય છે. બેન્‍ચે જણાવ્‍યું હતું કે તેણે વારંવાર અવલોકન કર્યું છે કે આ કાયદાઓનો દુરુપયોગ થઈ રહ્યો છે. તેથી, આ નિર્ણયની એક નકલ ભારત સરકારના કાયદા સચિવને મોકલવી જોઈએ. કોર્ટે સૂચન કર્યું કે આ સમસ્‍યાને દૂર કરવા માટે પગલાં લેવામાં આવે. આમાં રોમિયા-જુલિયટ કલમ રજૂ કરવાનો સમાવેશ થાય છે, જે સાચા કિશોર પ્રેમ સંબંધોને આ કાયદાના ચુંગાલમાંથી બચાવશે. વધુમાં, બદલો લેવા માટે આ કાયદાઓનો ઉપયોગ કરનારાઓ સામે કાર્યવાહી કરવા માટે એક પદ્ધતિ બનાવવી જોઈએ.