નવી દિલ્હી: દિલ્હી પોલીસના સ્પેશિયલ સેલએ અત્યાર સુધીના સૌથી મોટા અને ખતરનાક આંતરરાષ્ટ્રીય સાયબર સિન્ડિકેટનો પર્દાફાશ કર્યો છે, જેણે દેશભરના નાગરિકો પાસેથી અંદાજે ૧૦૦ કરોડ રૂપિયાની છેતરપિંડી કરી છે. આ ગેંગ ‘સિમ બોક્સ’ ટેકનોલોજીનો ઉપયોગ કરીને હજારો વર્ચ્યુઅલ નંબર ઓપરેટ કરતી હતી. DCP વિનીત કુમારના જણાવ્યા અનુસાર, પોલીસે દિલ્હી, મુંબઈ અને મોહાલીમાં દરોડા પાડીને એક તાઈવાની નાગરિક સુંગ ચેન સહિત સાત લોકોની ધરપકડ કરી છે. આ ગેંગ સામાન્ય લોકોને ‘ડિજિટલ ધરપકડ’ ના નામે ડરાવતી હતી અને દિલ્હી વિસ્ફોટો કે ટેરર ફંડિંગમાં તેમનું નામ હોવાનું કહી કરોડો રૂપિયા પડાવતી હતી.

આ તપાસમાં સૌથી ભયાનક વળાંક ત્યારે આવ્યો જ્યારે આ ગેંગના તાર પાકિસ્તાન અને ચીન સાથે જોડાયેલા હોવાનું સામે આવ્યું. પોલીસને મોહાલીમાંથી જે સિમ કાર્ડ્સ મળી આવ્યા છે, તેના પર પાકિસ્તાની ટેલિકોમ કંપનીના IMEI નંબર જોવા મળ્યા છે, જે સ્પષ્ટ કરે છે કે આ ગેંગને સરહદ પારથી માર્ગદર્શન મળી રહ્યું હતું. તાઈવાનનો નાગરિક સુંગ ચેન આ સમગ્ર નેટવર્કનું ટેકનિકલ માળખું સંભાળતો હતો, જ્યારે શશિ પ્રસાદ અને પરવિંદર સિંહ જેવા સ્થાનિક સાગરીતો સિમ બોક્સ સેટ કરવા માટે ડ્રાઈવર તરીકેની આડમાં રૂમ ભાડે રાખતા હતા. આ સિન્ડિકેટ દ્વારા ૨૦,૦૦૦ થી વધુ ફોન નંબરોનો ઉપયોગ કરીને ૧,૦૦૦ થી વધુ છેતરપિંડીની ફરિયાદો અત્યાર સુધી નોંધાઈ ચૂકી છે.

પોલીસે આ ઓપરેશન દરમિયાન મોટી સંખ્યામાં ભૌતિક સિમ કાર્ડ અને ઈ-સિમ ઉપકરણો જપ્ત કર્યા છે. કોયમ્બતુરથી લઈને દિલ્હીના નરેલા સુધી ફેલાયેલા આ નેટવર્કે ભારતીય સુરક્ષા એજન્સીઓની ઊંઘ ઉડાવી દીધી છે. તપાસમાં બહાર આવ્યું છે કે આ ગેંગ માત્ર પૈસા જ નથી લૂંટતી, પરંતુ ભારતીય ટેલિકોમ ઈન્ફ્રાસ્ટ્રક્ચરનો દુરુપયોગ કરીને જાસૂસી પણ કરી શકતી હતી. હાલમાં દિલ્હી પોલીસ કેન્દ્રીય એજન્સીઓ સાથે મળીને આ કેસની વિદેશી લિંક્સ અને આતંકી સંગઠનો સાથેના સંભવિત સંબંધોની ઊંડાણપૂર્વક તપાસ કરી રહી છે. આ કેસ ડિજિટલ યુગમાં સામાન્ય નાગરિકોની સુરક્ષા સામે મોટો પડકાર બનીને ઉભર્યો છે.