અનંતપુર: આંધ્રપ્રદેશના અનંતપુર રેલ્વે સ્ટેશન પર બનેલી એક ઘટનાએ આજે સોશિયલ મીડિયા પર સનસનાટી મચાવી દીધી છે. ટ્રેનમાં મુસાફરી કરી રહેલા એક ગ્રાહકને ભોજન પહોંચાડવાના ચક્કરમાં એક સ્વિગી ડિલિવરી એજન્ટ ચાલતી ટ્રેનમાંથી નીચે ઉતરવા જતાં ભયાનક રીતે પટકાયો હતો. આ ઘટનાનો વીડિયો વાયરલ થતાં જ ઇન્ટરનેટ પર 'ઝડપી ડિલિવરી' અને કામદારોની સુરક્ષાને લઈને મોટી ચર્ચા છેડાઈ છે.
શું હતી સમગ્ર ઘટના?
પ્રશાંતિ એક્સપ્રેસ (ટ્રેન નંબર 18464) અનંતપુર સ્ટેશન પર માત્ર 1 થી 2 મિનિટ માટે ઉભી રહી હતી. ફર્સ્ટ એસીમાં બેઠેલા મુસાફરને ફૂડ પાર્સલ આપવા માટે ડિલિવરી બોય ટ્રેનમાં ચઢ્યો હતો. પરંતુ મુસાફરને શોધવામાં અને ભોજન આપવામાં સમય વીતી ગયો અને ટ્રેન ચાલવા લાગી. સ્ટેશનની બહાર પોતાની બાઇક અને અન્ય ઓર્ડર્સની ચિંતામાં એજન્ટે ચાલતી ટ્રેનમાંથી કૂદકો માર્યો અને પ્લેટફોર્મ પર ગંભીર રીતે પટકાયો હતો.
“આ અકસ્માત નહીં, જવાબદારીની નિષ્ફળતા છે”
આ ઘટનાને રેકોર્ડ કરનાર રાહદારીએ ઇન્સ્ટાગ્રામ પર આક્રોશ વ્યક્ત કરતા લખ્યું કે, “કોઈપણ ઓર્ડર કે ડિલિવરી માનવ જીવન કરતાં વધુ મૂલ્યવાન નથી. મુસાફરોએ પોતે પ્લેટફોર્મ પર આવીને ફૂડ લેવું જોઈએ, ડિલિવરી પાર્ટનરને ટ્રેનમાં ચઢવાની ફરજ ન પાડવી જોઈએ.” નેટીઝન્સે પણ કંપનીઓ દ્વારા અપાતી ‘10 મિનિટ ડિલિવરી’ જેવી સેવાઓનો બહિષ્કાર કરવાની માંગ કરી છે, જે ડિલિવરી એજન્ટોને જોખમ ખેડવા મજબૂર કરે છે.
સ્વિગીની સ્પષ્ટતા અને પ્રોટોકોલ
ચારેબાજુથી ઘેરાયા બાદ સ્વિગી કંપનીએ સત્તાવાર નિવેદન બહાર પાડ્યું છે. કંપનીએ જણાવ્યું કે, “અમે તપાસ કરી છે અને તે જાણીને રાહત થઈ છે કે ડિલિવરી પાર્ટનર સુરક્ષિત છે અને તેને કોઈ ઈજા થઈ નથી. અમારા પ્રોટોકોલ મુજબ ચાલતી ટ્રેનમાં ચઢવા કે ઉતરવાની સખત મનાઈ છે.” કંપનીએ ભવિષ્યમાં આવી ઘટનાઓ રોકવા માટે સેફ્ટી ટ્રેનિંગ વધુ મજબૂત કરવાની ખાતરી આપી છે.
જોકે, આ ઘટનાએ ફરી એકવાર સાબિત કરી દીધું છે કે ટેકનોલોજી અને સુવિધાની દોડમાં ક્યાંક માનવીય સંવેદનાઓ અને સુરક્ષા પાછળ રહી ગઈ છે.