નુર્ક : વિશ્વના સૌથી મોટા ટાપુ ગ્રીનલેન્ડને ખરીદવા અથવા તેના પર કબજો જમાવવાના અમેરિકી પ્રમુખ ડોનાલ્ડ ટ્રમ્પના વિવાદાસ્પદ નિવેદને આંતરરાષ્ટ્રીય સ્તરે ખળભળાટ મચાવી દીધો છે. ટ્રમ્પની સતત ધમકીઓ સામે હવે ગ્રીનલેન્ડના પાંચેય મુખ્ય રાજકીય પક્ષોએ એકસૂરે ગર્જના કરી છે કે, તેમના દેશનું ભવિષ્ય કોઈ વિદેશી શક્તિ નહીં પણ ત્યાંના સ્થાનિક લોકો જ નક્કી કરશે.
ટ્રમ્પની ‘ડાયરેક્ટ’ ધમકી: કાં તો સોદો કરો કાં તો મુશ્કેલી વેઠો
વ્હાઇટ હાઉસ ખાતે પત્રકારો સાથે વાત કરતા ડોનાલ્ડ ટ્રમ્પે અત્યંત આક્રમક વલણ અપનાવ્યું છે. તેમણે સ્પષ્ટ શબ્દોમાં કહ્યું કે, "અમે ગ્રીનલેન્ડ વિશે કંઈક કરવા જઈ રહ્યા છીએ, ભલે લોકોને તે ગમે કે ન ગમે." ટ્રમ્પના મતે, આર્કટિક ક્ષેત્રમાં અમેરિકાની સુરક્ષા માટે ગ્રીનલેન્ડ પર કબજો હોવો જરૂરી છે, જેથી રશિયા કે ચીન ત્યાં પોતાનો પગપેસારો ન કરી શકે. ટ્રમ્પે તો ત્યાં સુધી કહી દીધું કે જો શાંતિથી સોદો નહીં થાય, તો તેઓ 'મુશ્કેલ રસ્તો' અપનાવતા પણ ખચકાશે નહીં.
ગ્રીનલેન્ડનો જડબાતોડ જવાબ
ગ્રીનલેન્ડની સંસદ ‘ઇનાત્સીસાર્ટુટ’ ના નેતાઓએ સંયુક્ત નિવેદન જારી કરીને અમેરિકાને તેની સીમામાં રહેવા ચેતવણી આપી છે. પક્ષોએ સ્પષ્ટ કર્યું છે કે, "અમે અમેરિકન બનવા માંગતા નથી, અમે ડેનિશ બનવા માંગતા નથી, અમે ફક્ત ગ્રીનલેન્ડર બનીને ગર્વથી જીવવા માંગીએ છીએ." આ ટાપુની 57,000 ની વસ્તી અત્યારે અમેરિકાના આ સામ્રાજ્યવાદી વલણ સામે વિરોધમાં ઉતરી છે.
ડેનમાર્ક પણ મેદાનમાં: નાટો વિખેરાઈ જવાની ચેતવણી
ગ્રીનલેન્ડ હાલમાં ડેનમાર્ક હેઠળનો એક અર્ધ-સ્વાયત્ત પ્રદેશ છે. ડેનમાર્કના વડા પ્રધાન મેટ્ટે ફ્રેડરિકસેને ટ્રમ્પના આ દાવાઓને સખત શબ્દોમાં નકારી કાઢ્યા છે. તેમણે ચેતવણી આપી છે કે જો અમેરિકા ગ્રીનલેન્ડ પર કોઈ પણ પ્રકારનું લશ્કરી કે આર્થિક દબાણ લાવશે, તો તે નાટો (NATO) જોડાણના અંતની શરૂઆત હશે અને બીજા વિશ્વયુદ્ધ પછીની વૈશ્વિક સુરક્ષા વ્યવસ્થા જોખમાશે.
બરફથી ઢંકાયેલા આ ટાપુ પર કુદરતી સંસાધનો અને લશ્કરી વ્યૂહરચનાનો મોટો ભંડાર હોવાને કારણે ટ્રમ્પનો આ 'જુસ્સો' હવે વિશ્વ યુદ્ધ જેવી સ્થિતિ સર્જી શકે તેવી આશંકા સેવાઈ રહી છે.