રાઉરકેલા : ઓડિશાના રાઉરકેલામાં આજે બપોરે એક ભયાનક વિમાન દુર્ઘટના ટળી હતી. ભુવનેશ્વરથી છ મુસાફરોને લઈને ઉડેલી 'ઇન્ડિયાવન એર'ની નવ સીટવાળી નાની ફ્લાઇટ રાઉરકેલા એરસ્ટ્રિપ નજીક જગડા બ્લોક પાસે ક્રેશ-લેન્ડ થઈ ગઈ હતી. પાયલોટે વિમાન જમીન પર પટકાયાની ગણતરીની મિનિટો પહેલા જ 'મેડે' (Mayday) ડિસ્ટ્રેસ કોલ જારી કરીને એર ટ્રાફિક કંટ્રોલને સંકટની જાણ કરી દીધી હતી.

મૃત્યુને માત: પાયલોટની સૂઝબૂઝ કામ લાગી

ભુવનેશ્વર એરપોર્ટ પરથી બપોરે 12:27 વાગ્યે રવાના થયેલું આ ચાર્લી-208 વિમાન નિર્ધારિત સમયે લેન્ડ થાય તે પહેલા જ મુશ્કેલીમાં મુકાયું હતું. બપોરે 1:14 વાગ્યે પાયલોટે ATC ને જણાવ્યું કે વિમાનમાં ગંભીર ખામી સર્જાઈ છે અને તે રનવે સુધી પહોંચી શકે તેમ નથી. પાયલોટે હિંમત બતાવીને રહેણાંક વિસ્તારને બદલે વિમાનને ખુલ્લા મેદાનમાં ઉતારવાનો નિર્ણય લીધો હતો. આ ફોર્સ્ડ લેન્ડિંગ દરમિયાન વિમાન જોરથી પટકાયું હતું, જેના કારણે પાંખો અને આગળના ભાગને ભારે નુકસાન થયું હતું.

મુસાફરોની સ્થિતિ અને બચાવ કાર્ય

વિમાન પટકાયાનો અવાજ સાંભળીને સ્થાનિક લોકો ઘટનાસ્થળે દોડી આવ્યા હતા. વિમાનમાં સવાર બે પાયલોટ - કેપ્ટન નવીન કડાંગા અને સહ-પાઇલટ તરુણ શ્રીવાસ્તવ સહિત ચાર મુસાફરો (સુશાંત બિવાલ, અનિતા સાહુ, સુનિલ અગ્રવાલ અને સબિતા અગ્રવાલ) ને ઇજાઓ પહોંચી છે. ફાયર બ્રિગેડ અને પોલીસની ટીમોએ તાત્કાલિક તમામને બહાર કાઢી હોસ્પિટલમાં ખસેડ્યા હતા. રાહતની વાત એ છે કે તમામ 6 લોકો અત્યારે ખતરાથી બહાર છે.

તપાસના આદેશ: કેમ સર્જાઈ ખામી?

પ્રાથમિક દ્રષ્ટિએ આ દુર્ઘટના પાછળ યાંત્રિક ખામી (Mechanical Failure) હોવાની શંકા છે. નાગરિક ઉડ્ડયન મહાનિર્દેશાલય (DGCA) અને એરક્રાફ્ટ એક્સિડેન્ટ ઇન્વેસ્ટિગેશન બ્યુરો (AAIB) એ આ મામલે ઉચ્ચ સ્તરીય તપાસના આદેશ આપ્યા છે. રવિવારે દિલ્હી અને કોલકાતાથી નિષ્ણાતોની ટીમ રાઉરકેલા પહોંચીને વિમાનના બ્લેક બોક્સ અને એન્જિનની તપાસ કરશે.

રાઉરકેલાના આકાશમાં સર્જાયેલા આ હાઈ-વોલ્ટેજ ડ્રામા બાદ સમગ્ર વિસ્તારમાં ભયનો માહોલ છે, પરંતુ પાયલોટની સમયસૂચકતાને કારણે આજે એક મોટી જાનહાનિ ટળી છે.