નવી દિલ્હી : ભારતના સંરક્ષણ મંત્રી રાજનાથ સિંહે આજે દેશના યુવા ધનનો ઉત્સાહ વધારતા એક શક્તિશાળી મંત્ર આપ્યો છે. નવી દિલ્હીમાં આયોજિત 'વિકસિત ભારત યંગ લીડર્સ ડાયલોગ 2026' માં બોલતા તેમણે દેશના ભાવિ ગણાતા યુવાનોને આર્ટિફિશિયલ ઇન્ટેલિજન્સ (AI), ક્વોન્ટમ કમ્પ્યુટિંગ, બાયોટેકનોલોજી અને સ્પેસ રિસર્ચ જેવા અત્યાધુનિક ક્ષેત્રોમાં નિપુણતા મેળવવા ભારપૂર્વક વિનંતી કરી છે.

જ્ઞાનની સાથે નેતૃત્વનો સંગમ

સંરક્ષણ મંત્રીએ કાર્યક્રમમાં ભાગ લેનાર યુવાનોની પ્રશંસા કરતા જણાવ્યું હતું કે, તમારી પાસે માત્ર જ્ઞાન જ નથી, પરંતુ દેશને નવી ઊંચાઈઓ પર લઈ જવાની ક્ષમતા અને અતૂટ જુસ્સો પણ છે. તેમણે યુવાનોને ‘બહુ-શાખાકીય શિક્ષણ’ (Multi-disciplinary Education) અપનાવવા પર ભાર મૂક્યો હતો, જેથી ભારત માત્ર ટેક્નોલોજી વાપરનાર નહીં પણ ટેક્નોલોજી બનાવનાર દેશ બને.

જીવનના પડકારો પર વિજય

રાજનાથ સિંહે યુવાનોને જીવનના કઠિન પાઠ ભણાવતા કહ્યું કે, "કોઈપણ વ્યક્તિએ મુશ્કેલીઓથી ગભરાવાની જરૂર નથી. જીવનમાં આવતા પડકારો કોઈ અપવાદ નથી, પરંતુ તે વિકાસનો એક કુદરતી ભાગ છે. દરેક મુશ્કેલી તમને પહેલા કરતા વધુ પરિપક્વ અને મજબૂત બનાવે છે." તેમણે ઉમેર્યું કે, પડકાર ગમે તેટલો મોટો હોય, તેને ક્યારેય પોતાના મનોબળ પર હાવી થવા ન દેવો જોઈએ.

રાષ્ટ્ર નિર્માણ માટે નવીન વિચારસરણી

સંરક્ષણ મંત્રીએ વિશ્વાસ વ્યક્ત કર્યો હતો કે જો ભારતીય યુવાનો નવીન વિચારસરણી અને ટેક્નોલોજીનો સમન્વય કરશે, તો ભારતને 'વિકસિત ભારત' બનતા કોઈ રોકી શકશે નહીં. તેમણે યુવાનોને પ્રોત્સાહિત કર્યા કે તેઓ માત્ર કારકિર્દી બનાવવા માટે નહીં, પરંતુ રાષ્ટ્રના ગૌરવમાં વધારો કરવા માટે નવા વિજ્ઞાન અને સંશોધનોમાં ઝંપલાવે.