ચંદ્રકોણા (પશ્ચિમ બંગાળ) :પશ્ચિમ બંગાળમાં વિધાનસભા ચૂંટણીઓ પહેલા રાજકીય પારો સાતમા આસમાને પહોંચી ગયો છે. શનિવારે રાત્રે પશ્ચિમ મેદિનીપુર જિલ્લામાં વિધાનસભાના વિરોધ પક્ષના નેતા સુવેન્દુ અધિકારીના કાફલા પર થયેલા હુમલાએ આખા રાજ્યમાં ખળભળાટ મચાવી દીધો છે. સુવેન્દુ અધિકારીએ આક્ષેપ કર્યો છે કે જ્યારે તેઓ પુરુલિયાની રેલી પૂરી કરીને પરત ફરી રહ્યા હતા, ત્યારે તૃણમૂલ કોંગ્રેસ (TMC) ના 15 થી 20 ગુંડાઓએ તેમની કારને નિશાન બનાવી હતી.
 સુવેન્દુ અધિકારીએ સોશિયલ મીડિયા પર આ ઘટનાના ભયાનક દ્રશ્યો વર્ણવતા કહ્યું કે, "રાત્રે લગભગ 8:20 વાગ્યે ચંદ્રકોણા રોડ પર આ કાયરતાપૂર્ણ હુમલો કરવામાં આવ્યો. હુમલાખોરો પાસે પેટ્રોલ અને ડીઝલ હતું, જેનો હેતુ અત્યંત ખતરનાક લાગતો હતો. સૌથી ચોંકાવનારી વાત એ છે કે આ બધું પોલીસની હાજરીમાં થયું અને કાયદાના રક્ષકો મૂક પ્રેક્ષક બનીને તમાશો જોતા રહ્યા."
આ ઘટનાથી રોષે ભરાયેલા સુવેન્દુ અધિકારી સીધા ચંદ્રકોણા પોલીસ સ્ટેશન પહોંચ્યા હતા અને ત્યાં જ જમીન પર ધરણા પર બેસી ગયા હતા. તેમણે પોલીસ સ્ટેશનની અંદરથી જ હુંકાર કર્યો કે, "આ માત્ર મારા પર હુમલો નથી, પણ બંગાળના દરેક વિપક્ષી અવાજને દબાવવાનો પ્રયાસ છે. મમતા બેનર્જીની સરકાર જનતાનો આક્રોશ જોઈને ગભરાઈ ગઈ છે એટલે ગુંડાગીરી પર ઉતરી આવી છે." તેમણે સ્પષ્ટ કર્યું કે જ્યાં સુધી હુમલાખોરોની ધરપકડ નહીં થાય ત્યાં સુધી તેઓ પોલીસ સ્ટેશન છોડશે નહીં.
 ઘટના સ્થળે હાજર ભાજપના કાર્યકરોએ જણાવ્યું કે રસ્તાની એક તરફ ભાજપના સમર્થકો હતા અને બીજી તરફ ટીએમસીના કાર્યકરો ધ્વજ લઈને ઉભા હતા. જેવી સુવેન્દુની કાર પસાર થઈ કે તરત જ પથ્થરમારો અને હુમલો શરૂ કરી દેવામાં આવ્યો હતો. કેન્દ્રીય સુરક્ષા દળોએ ત્વરિત કાર્યવાહી કરીને સુવેન્દુ અધિકારીને સુરક્ષિત બહાર કાઢ્યા હતા. સુવેન્દુએ આ હુમલાને ટીએમસીની ‘હતાશા’ ગણાવી છે અને કહ્યું છે કે જનતા હવે આ સરમુખત્યારશાહી સહન કરવા તૈયાર નથી. હાલમાં સમગ્ર વિસ્તારમાં ભારે પોલીસ બંદોબસ્ત ગોઠવી દેવામાં આવ્યો છે અને પરિસ્થિતિ તંગ છે.