રાજકોટ:ભારતીય રેલવેના ઈતિહાસમાં સુરક્ષા અને સતર્કતાના પર્યાય સમાન એક એવી ઘટના સામે આવી છે, જેણે આખા દેશનું ધ્યાન ખેંચ્યું છે. રાજકોટ ડિવિઝનમાં લોકો પાયલટ તરીકે ફરજ બજાવતા શ્રી રામપ્રવેશ કુમારે પોતાની અપ્રતિમ સૂઝબૂઝથી એક ભયાનક દુર્ઘટનાને ટાળી દીધી છે. નવી દિલ્હીના પ્રતિષ્ઠિત યશોભૂમિ કન્વેન્શન સેન્ટર ખાતે આયોજિત 70મા રેલ સપ્તાહના ભવ્ય સમારોહમાં તેમને કેન્દ્રીય રેલવે મંત્રી શ્રી અશ્વિની વૈષ્ણવના હસ્તે ‘અતિ વિશિષ્ટ રેલ સેવા પુરસ્કાર–2025’ એનાયત કરવામાં આવ્યો હતો. આ એવોર્ડ મળતાની સાથે જ રાજકોટ રેલવે ડિવિઝન અને સમગ્ર પશ્ચિમ રેલવેમાં ખુશીની લહેર વ્યાપી ગઈ છે.

આ સન્માન પાછળની વાર્તા કોઈ રોમાંચક ફિલ્મથી ઓછી નથી. પીપાવાવ પોર્ટથી અત્યંત જ્વલનશીલ એલપીજી (LPG) ગેસ લઈને અંબાલા જઈ રહેલી માલગાડી જ્યારે સાવરકુંડલા અને લીલીયા મોટા સ્ટેશન વચ્ચેના એક વળાંક પરથી પસાર થઈ રહી હતી, ત્યારે રામપ્રવેશ કુમારની બાજ નજર ટ્રેનના એક વેગન પર પડી. ચાલતી ગાડીએ વળાંક પર તેમણે જોયું કે એક વેગનનું ઢાંકણું ખુલ્લું છે. જોખમની ગંભીરતા સમજી તેમણે જરા પણ વિલંબ કર્યા વિના ઈમરજન્સી બ્રેક લગાવી ગાડી ઊભી રાખી દીધી હતી. તપાસ કરતા વેગન નંબર 0898668181 માંથી પ્રચંડ વેગે ગેસ લીકેજ થઈ રહ્યો હોવાનું બહાર આવ્યું હતું.

જો તે સમયે ગાડી ઊભી ન રાખવામાં આવી હોત, તો ટ્રેનના ગર્ષણ કે સામાન્ય તણખાથી સમગ્ર ટ્રેન આગના ગોળામાં ફેરવાઈ ગઈ હોત અને આસપાસના વિસ્તારમાં મોટો વિનાશ સર્જાઈ શક્યો હોત. રામપ્રવેશ કુમારની આ કામગીરીથી માત્ર રેલવેની કરોડોની સંપત્તિ જ નથી બચી, પણ હજારો લોકોની સુરક્ષા સુનિશ્ચિત થઈ છે. આ વર્ષે સમગ્ર ભારતમાંથી પસંદ કરાયેલા અંદાજે 100 શ્રેષ્ઠ કર્મચારીઓમાં પશ્ચિમ રેલવેના માત્ર સાત રત્નોનો સમાવેશ થયો હતો, જેમાં રામપ્રવેશ કુમારની સિદ્ધિ સર્વોપરી રહી છે. તેમની આ નિષ્ઠાએ સાબિત કરી દીધું કે ટેકનોલોજી ગમે તેટલી આગળ વધે, પણ માનવીય સતર્કતાનો કોઈ પર્યાય નથી.

રાજકોટ ડિવિઝનલ રેલવે મેનેજર (DRM) શ્રી ગિરિરાજ કુમાર મીનાએ આ ઐતિહાસિક ક્ષણને વધાવતા જણાવ્યું હતું કે, “રામપ્રવેશ કુમારની આ સિદ્ધિ સમગ્ર ડિવિઝન માટે ગર્વની વાત છે. તેમની તત્પરતા અન્ય કર્મચારીઓ માટે સુરક્ષાના ઉચ્ચતમ ધોરણો જાળવી રાખવા માટે પ્રેરણાનું ઝરણું બનશે.” દિલ્હીના મંચ પર જ્યારે રેલવે મંત્રીએ તેમને મેડલ અને પ્રશસ્તિપત્ર અર્પણ કર્યું, ત્યારે ઉપસ્થિત સૌ કોઈએ ઊભા થઈને આ જાંબાઝ પાયલટને વધાવ્યા હતા. રાજકોટ પહોંચતા જ તેમનું ભવ્ય સ્વાગત કરવાની તૈયારીઓ પણ રેલવે તંત્ર દ્વારા કરવામાં આવી છે.