તેલ અવીવ: ઈઝરાયેલની ગુપ્તચર એજન્સીના અહેવાલ મુજબ ઈરાનમાં સ્થિતિ ૧૯૯૯ પછી સૌથી નાજુક સ્તરે પહોંચી, તહેરાનની સડકો પર હજારો લોકો ઉતરી આવ્યા છે.

ઈરાનમાં સરકાર વિરોધી દેખાવો હવે લોહિયાળ ગૃહયુદ્ધ જેવી સ્થિતિમાં ફેરવાઈ ગયા છે. આંતરરાષ્ટ્રીય મીડિયા 'આઈ ૨૪ ન્યૂઝ' અને ઈઝરાયેલી ગુપ્તચર વિભાગના અહેવાલો મુજબ, ઈરાનમાં ચાલુ વિરોધ પ્રદર્શનમાં મૃત્યુ પામેલા લોકોની સંખ્યા ૧,૦૦૦ (એક હજાર) નો આંકડો પાર કરી ગઈ છે. આ પ્રથમ વખત છે જ્યારે મૃત્યુઆંક આટલી મોટી સંખ્યામાં હોવાના અહેવાલો સામે આવ્યા છે.

ઈઝરાયેલી અધિકારીઓના જણાવ્યા અનુસાર, જો વિરોધ પ્રદર્શનની ગતિ આવી જ રહી તો ઈરાનનું વર્તમાન શાસન પડી ભાંગવાની શક્યતા છે. ૧૯૯૯ પછી શાસન માટે આ સૌથી નાજુક સમય માનવામાં આવે છે. 

તહેરાન સહિતના મોટા શહેરોમાં હજારો લોકો રસ્તા પર ઉતરી આવ્યા છે. સોશિયલ મીડિયા પર વાયરલ થયેલા ફૂટેજમાં તહેરાનના કહરીઝક ફોરેન્સિક મેડિકલ સેન્ટર બહાર મૃતદેહોના ઢગલા જોવા મળ્યા હતા. એક વીડિયોમાં સ્ક્રીન પર ૦૦૧થી ૨૫૦ સુધીના નંબર જોવા મળ્યા હતા, જે સૂચવે છે કે માત્ર તહેરાનમાં જ એક રાતમાં ૨૫૦થી વધુ લોકોના મોત થયા હોઈ શકે છે.

ઉપરાંત, 'ધ એસોસિએટેડ પ્રેસ'ના અહેવાલ મુજબ ૧૦,૬૦૦થી વધુ લોકોની ધરપકડ કરવામાં આવી છે. જેમાં મોટી સંખ્યામાં સામાન્ય નાગરિકો અને કાર્યકરોનો સમાવેશ થાય છે. સરકારી દમનમાં અત્યાર સુધીમાં સેંકડો લોકો ઘાયલ થયા છે અને હોસ્પિટલોમાં જગ્યા ખૂટી પડી હોવાના અહેવાલો છે.