નવી દિલ્હી: ભારત અને અમેરિકાની વ્યૂહાત્મક ભાગીદારી હવે માત્ર વાતોમાં જ નહીં, પણ ભવિષ્યની ટેકનોલોજીના મેદાનમાં પણ જોવા મળશે. ભારતમાં અમેરિકાના નવા નિયુક્ત રાજદૂત સર્જિયો ગોરે દિલ્હીમાં પોતાના પ્રથમ સંબોધનમાં એક અત્યંત મહત્વપૂર્ણ જાહેરાત કરી છે. તેમણે જણાવ્યું કે, અમેરિકાની આગેવાની હેઠળના શક્તિશાળી ગઠબંધન 'પેક્સ સિલિકા' (PAX Silica) માં ભારતને પૂર્ણ સભ્ય તરીકે જોડાવા માટે સત્તાવાર આમંત્રણ આપવામાં આવશે.
શું છે આ 'પેક્સ સિલિકા' અને ભારતને શું ફાયદો?
'પેક્સ સિલિકા' એ આધુનિક યુગનું એક એવું વ્યૂહાત્મક ગ્રુપ છે જેનો ઉદ્દેશ્ય આખી દુનિયામાં સેમિકન્ડક્ટર (ચિપ્સ) અને આર્ટિફિશિયલ ઈન્ટેલિજન્સ (AI) ની સપ્લાય ચેઈનને સુરક્ષિત કરવાનો છે. અત્યાર સુધી આ ક્ષેત્રમાં ચીનનો દબદબો રહ્યો છે, પરંતુ હવે અમેરિકા ભારત, જાપાન, દક્ષિણ કોરિયા અને ઇઝરાયેલ જેવા દેશો સાથે મળીને ચીનના વિકલ્પ તરીકે ભારતને પ્રોજેક્ટ કરી રહ્યું છે. આ જોડાણથી ભારતમાં સેમિકન્ડક્ટર પ્લાન્ટ્સ અને હાઈ-ટેક મેન્યુફેક્ચરિંગને જબરદસ્ત વેગ મળશે.
ટ્રમ્પ અને મોદીની 'રીઅલ ફ્રેન્ડશિપ'
રાજદૂત સર્જિયો ગોરે વડાપ્રધાન નરેન્દ્ર મોદી અને રાષ્ટ્રપતિ ડોનાલ્ડ ટ્રમ્પ વચ્ચેના અંગત સંબંધો વિશે પણ રસપ્રદ વાતો શેર કરી હતી. તેમણે કહ્યું, "મેં ટ્રમ્પ સાથે દુનિયાભરનો પ્રવાસ કર્યો છે, પણ મોદી સાથે તેમની જે મિત્રતા છે તે એકદમ 'વાસ્તવિક' છે." તેમણે વધુમાં સંકેત આપ્યો કે રાષ્ટ્રપતિ ટ્રમ્પ આગામી એક-બે વર્ષમાં ભારતની મુલાકાતે આવી શકે છે. એટલું જ નહીં, ટ્રમ્પને દિલ્હીનો 'ઈન્ડિયા ગેટ' પેરિસના આર્ક ડી ટ્રાયમ્ફ કરતા પણ વધુ પસંદ હોવાનો કિસ્સો તેમણે રજૂ કર્યો હતો.
વેપાર કરાર પર મોટું અપડેટ
ભારત અને અમેરિકા વચ્ચે લાંબા સમયથી ચાલી રહેલા ટ્રેડ ડીલ (વેપાર કરાર) વિશે વાત કરતા ગોરે જણાવ્યું કે, બંને દેશો ખૂબ જ સક્રિયતાથી વાતચીત કરી રહ્યા છે અને આવતીકાલે જ તેની મહત્વની બેઠક યોજાવાની છે. ભારત વિશ્વનો સૌથી મોટો દેશ હોવાથી આ પ્રક્રિયામાં સમય લાગવો સ્વાભાવિક છે, પરંતુ બંને પક્ષો તેને જલ્દી પૂર્ણ કરવા કટિબદ્ધ છે.
આ જાહેરાત બાદ ભારત હવે માત્ર વિશ્વની સૌથી મોટી લોકશાહી જ નહીં, પરંતુ ભવિષ્યની ટેકનોલોજી અને આર્થિક સુરક્ષા માટે પણ અમેરિકાનું અનિવાર્ય ભાગીદાર બની ગયું છે.