મુંબઈ : મુંબઈ મહાનગરપાલિકા (BMC) ની ચૂંટણીના પડઘમ વચ્ચે મહારાષ્ટ્રના રાજકારણમાં રોજ નવા સમીકરણો રચાઈ રહ્યા છે. તાજેતરમાં સુપ્રિયા સુલેએ વડાપ્રધાન નરેન્દ્ર મોદીની પ્રશંસા કરતા તેઓ ભાજપમાં જોડાઈ શકે છે તેવી અટકળોએ જોર પકડ્યું છે. આ મુદ્દે જ્યારે નાયબ મુખ્યમંત્રી અજિત પવારને પૂછવામાં આવ્યું ત્યારે તેમણે પોતાની લાક્ષણિક શૈલીમાં જવાબ આપતા કહ્યું કે, "હું કોઈ જ્યોતિષી નથી કે ભવિષ્ય ભાખું, મારું અત્યારનું ધ્યાન માત્ર ૧૫ જાન્યુઆરીએ આવનારી ચૂંટણી અને વિકાસ પર છે."
પરિવાર અને રાજકારણ પર સ્પષ્ટવક્તા અજિતદાદા
જ્યારે અજિત પવારને પૂછવામાં આવ્યું કે શું NCP ના બંને જૂથો (શરદ પવાર અને અજિત પવાર જૂથ) ફરી એકસાથે આવશે? ત્યારે તેમણે કહ્યું, "અમે એક પરિવાર છીએ. કોઈપણ પરિવારમાં સુખ અને દુઃખના સમયે લોકો એકઠા થાય જ છે અને તેમાં કંઈ ખોટું નથી. પરંતુ અત્યારે અમારી સર્વોચ્ચ પ્રાથમિકતા ચૂંટણી જીતવાની છે." તેમણે વધુમાં ઉમેર્યું કે ઠાકરે ભાઈઓ (ઉદ્ધવ અને રાજ ઠાકરે) ના એકસાથે આવવાથી મતોનું વિભાજન ઘટશે અને તેમને ફાયદો થઈ શકે છે, જે એક વાસ્તવિકતા છે.
અન્નામલાઈના નિવેદન પર લાલઘૂમ
તમિલનાડુ ભાજપના નેતા કે. અન્નામલાઈના મુંબઈ અંગેના નિવેદન પર અજિત પવારે કડક વલણ અપનાવ્યું હતું. તેમણે સ્પષ્ટ શબ્દોમાં કહ્યું કે, "મુંબઈ ભારતનું છે અને ભારતની અંદર તે મહારાષ્ટ્રનો અવિભાજ્ય ભાગ છે. મુંબઈ હંમેશા મહારાષ્ટ્રમાં જ રહેશે. આવા નિવેદનો માત્ર ચૂંટણી વખતે ધ્યાન ખેંચવા માટે આપવામાં આવે છે."
શરદ પવાર માટે 'ભારત રત્ન'?
પોતાના કાકા અને NCP ના સ્થાપક શરદ પવારને 'ભારત રત્ન' આપવાની ચર્ચાઓ પર અજિત પવારે કહ્યું કે, આ નિર્ણય સંપૂર્ણપણે કેન્દ્ર સરકારનો છે. શરદ પવારે ૬૦ વર્ષથી વધુ સમય સુધી જાહેર જીવનમાં દેશની સેવા કરી છે અને તે બાબતે કોઈ પણ પોતાનો અભિપ્રાય આપી શકે છે.
ચૂંટણી પહેલા અજિત પવારનું આ સંતુલિત અને વિકાસલક્ષી વલણ સૂચવે છે કે તેઓ હાલમાં પરિવારના વિવાદોને બદલે સત્તા મેળવવાના સમીકરણો પર વધુ ભાર આપી રહ્યા છે.