નવી દિલ્હી | તા.13 : ભારતના રમતગમત નકશા પર આજથી બેડમિન્ટનનો રોમાંચ છવાઈ ગયો છે. નવી દિલ્હીના પ્રતિષ્ઠિત ઇન્દિરા ગાંધી ઇન્ડોર સ્ટેડિયમ ખાતે 'ઇન્ડિયા ઓપન બેડમિન્ટન ટુર્નામેન્ટ'નો ભવ્ય પ્રારંભ થયો છે. વર્ષ 2026 ની આ બીજી મોટી સુપર 750 ઇવેન્ટમાં ભારતની બે વખતની ઓલિમ્પિક મેડલ વિજેતા પીવી સિંધુ ભારતીય પડકારનું નેતૃત્વ કરી રહી છે. ઈજાના લાંબા બ્રેક બાદ વાપસી કરી રહેલી સિંધુ હાલમાં શાનદાર ફોર્મમાં છે અને મલેશિયા ઓપનની સેમિફાઇનલ સુધીની સફર બાદ હવે ઘરઆંગણે ટાઈટલ જીતવા માટે પ્રબળ દાવેદાર મનાઈ રહી છે.
પુરુષ સિંગલ્સમાં 'ભારત વિરુદ્ધ ભારત': કોણ મારશે બાજી?
પુરુષ સિંગલ્સમાં રમતપ્રેમીઓને પ્રથમ રાઉન્ડમાં જ હાઈ-વોલ્ટેજ ડ્રામા જોવા મળશે. ભારતનો સ્ટાર ખેલાડી લક્ષ્ય સેન અને ઉભરતો યુવા ખેલાડી આયુષ શેટ્ટી આમને-સામને ટકરાશે. આ મુકાબલાનો અર્થ એ છે કે બેમાંથી કોઈ એક જ ભારતીય ખેલાડી આગળના રાઉન્ડમાં પ્રવેશ કરી શકશે. આ ઉપરાંત અનુભવી એચએસ પ્રણોય અને કિદામ્બી શ્રીકાંત પણ આ ખિતાબ જીતવા માટે પોતાનું જોર લગાવશે.
ડબલ્સમાં વર્લ્ડ ક્લાસ જોડીઓનો જમાવડો
પુરુષોની ડબલ્સમાં ભારતની સ્ટાર જોડી અને વિશ્વની ત્રીજા ક્રમની જોડી સાત્વિકસાઈરાજ રંકીરેડ્ડી અને ચિરાગ શેટ્ટી પર ફરી એકવાર ચેમ્પિયન બનવાનું દબાણ રહેશે. વર્ષ 2022 માં ખિતાબ જીતનાર આ જોડી પોતાના ઘરઆંગણે ફરી ઈતિહાસ દોહરાવવા તૈયાર છે. મહિલા ડબલ્સમાં ટ્રીસા જોલી અને ગાયત્રી ગોપીચંદની જોડી તેમજ મિશ્ર ડબલ્સમાં તનિષા ક્રાસ્ટો અને ધ્રુવ કપિલાની જોડી ભારત માટે મેડલની આશા જગાવશે.
વર્લ્ડ ચેમ્પિયનશિપ માટે ડ્રેસ રિહર્સલ
આ ટુર્નામેન્ટ માત્ર એક ટ્રોફી જીતવા પૂરતી મર્યાદિત નથી. ચાલુ વર્ષે ઓગસ્ટ મહિનામાં આ જ સ્થળે 'BWF વર્લ્ડ ચેમ્પિયનશિપ' યોજાવાની છે. તેવામાં ઇન્ડિયા ઓપન તમામ ખેલાડીઓ માટે અહીંની પરિસ્થિતિઓ અને કોર્ટને સમજવાની સુવર્ણ તક છે. વિશ્વના ટોચના શટલર્સની હાજરીને કારણે દિલ્હીમાં આગામી કેટલાક દિવસો સુધી બેડમિન્ટનનો જબરદસ્ત ફિવર જોવા મળશે.