પુણે | તા.13 : મહારાષ્ટ્રના રાજકારણમાં પ્રોજેક્ટ્સ અને જમીનોના વિતરણને લઈને ચાલી રહેલું શબ્દયુદ્ધ હવે ચરમસીમાએ પહોંચ્યું છે. મહારાષ્ટ્ર નવનિર્માણ સેના (મનસે) ના પ્રમુખ રાજ ઠાકરેએ મંગળવારે પુણેમાં પત્રકારો સાથે વાત કરતા અદાણી જૂથ અને રાજ્ય સરકાર પર આકરા પ્રહારો કર્યા હતા. તેમણે સ્પષ્ટ કર્યું હતું કે તેમનો વિરોધ વિકાસ સામે નથી, પરંતુ જે રીતે તમામ ક્ષેત્રોમાં અદાણી જૂથનો 'એકાધિકાર' (Monopoly) સ્થાપિત કરવામાં આવી રહ્યો છે, તે દેશ માટે ખતરનાક છે.

"બધું જ એકાધિકારના નામે અદાણીને?"

રાજ ઠાકરેએ ગંભીર ચિંતા વ્યક્ત કરતા કહ્યું કે, "સિમેન્ટ હોય કે સ્ટીલ, બંદરો હોય કે એરપોર્ટ - સરકાર બધું જ એક જ કોર્પોરેટ એન્ટિટીને સોંપી રહી છે. આનાથી દેશ પર અપ્રમાણસર ભારણ વધશે." તેમણે અંબુજા સિમેન્ટનો ઉલ્લેખ કરતા કહ્યું કે જે ક્ષેત્ર અદાણીનું ક્યારેય કાર્યક્ષેત્ર નહોતું, તેમાં પણ તેઓ આજે બીજા ક્રમના સૌથી મોટા ખેલાડી બની ગયા છે. તેમણે ઈન્ડિગો એરલાઈન્સના તાજેતરના વિવાદનું ઉદાહરણ આપીને સમજાવ્યું કે જ્યારે કોઈ એક કંપની પાસે વધુ પડતું નિયંત્રણ આવે છે, ત્યારે સામાન્ય નાગરિકોએ કેવા ભયાનક અનુભવોમાંથી પસાર થવું પડે છે.

ફડણવીસના 'અદાણીકરણ'ના આરોપનો વળતો પ્રહાર

નાયબ મુખ્યમંત્રી દેવેન્દ્ર ફડણવીસે આરોપ લગાવ્યો હતો કે ઉદ્ધવ ઠાકરે અને રાજ ઠાકરે મહારાષ્ટ્રના વિકાસના વિરોધી છે અને ઉદ્ધવ ઠાકરેએ જ 'અદાણીકરણ'ની શરૂઆત કરી હતી. આના જવાબમાં રાજ ઠાકરેએ ૨૦૧૪ થી ૨૦૨૫ સુધી અદાણી જૂથને આપવામાં આવેલા પ્રોજેક્ટ્સનો એક વીડિયો બતાવીને ભાજપ અને શિવસેનાને ભીંસમાં લીધા હતા. તેમણે સવાલ ઉઠાવ્યો હતો કે, "નવા વ્યવસાયો સ્થાપવા માટે અદાણી પાસે આટલા મોટા પાયે નાણાં ક્યાંથી આવ્યા? કઈ બેંકોને તેમને ભંડોળ આપવા માટે ફરજ પાડવામાં આવી છે?"

નોકરીઓ અને દેશના ભવિષ્યની ચિંતા

રાજ ઠાકરેએ ચેતવણી આપી હતી કે જો આ રીતે કોઈ એક જ ઉદ્યોગપતિનું વર્ચસ્વ વધતું જશે, તો આવનારા સમયમાં નોકરીઓ જોખમમાં આવશે અને દેશના આર્થિક વિકાસને નુકસાન થશે. તેમણે નવી મુંબઈ એરપોર્ટનો ઉલ્લેખ કરતા કહ્યું કે મોટાભાગના એરપોર્ટ સરકારે વિકસાવ્યા હતા અને પછી અદાણીને સોંપવામાં આવ્યા. મનસે વડાના આ વિસ્ફોટક તેવરે મહારાષ્ટ્રના રાજકારણમાં ફરી એકવાર 'સ્થાનિક વિરુદ્ધ કોર્પોરેટ'ની ચર્ચા છેડી દીધી છે.