બેંગલુરુ:  કન્નડ સુપરસ્ટાર યશ, જેમને દુનિયાભરમાં 'રોકી ભાઈ' તરીકે ઓળખવામાં આવે છે, તેઓ અત્યારે પોતાની આગામી ફિલ્મ 'ટોક્સિક' (Toxic) ના કારણે મુશ્કેલીમાં મુકાતા જોવા મળી રહ્યા છે. યશના 40મા જન્મદિવસ પર રિલીઝ થયેલા આ ફિલ્મના ટીઝરે સોશિયલ મીડિયા પર ધૂમ મચાવી દીધી હતી, પરંતુ સાથે જ એક મોટો વિવાદ પણ છેડી દીધો છે. ટીઝરમાં યશ અને વિદેશી અભિનેત્રી બીટ્રિઝ તૌફેનબેક વચ્ચે કારમાં કેટલાક અત્યંત બોલ્ડ અને ઘનિષ્ઠ દ્રશ્યો દર્શાવવામાં આવ્યા છે. આ દ્રશ્યોને અશ્લીલ ગણાવીને સામાજિક કાર્યકર્તાઓ અને આમ આદમી પાર્ટીની મહિલા પાંખે સેન્સર બોર્ડ અને સરકાર સમક્ષ ટીઝર હટાવવાની માંગ કરી છે, જેનાથી કન્નડ ફિલ્મ ઉદ્યોગમાં હડકંપ મચી ગયો છે.

આ વિવાદની વચ્ચે યશનો એક જૂનો ઇન્ટરવ્યુ સોશિયલ મીડિયા પર આગની જેમ વાયરલ થઈ રહ્યો છે, જે અભિનેતા માટે મુશ્કેલીનું કારણ બન્યો છે. આ વીડિયોમાં યશ ખૂબ જ મક્કમતાથી કહેતા સંભળાય છે કે, "હું સ્ક્રીન પર ક્યારેય એવી મર્યાદા નહીં ઓળંગું કે જે હું મારા માતા-પિતા સાથે બેસીને જોઈ ન શકું." યશે તે સમયે પ્રતિજ્ઞા લીધી હતી કે તે ક્યારેય બોલ્ડ કે ઇન્ટિમેટ સીન્સ નહીં કરે. હવે યુઝર્સ 'ટોક્સિક'ના ટીઝર અને આ જૂના નિવેદનને સરખાવીને યશને ટ્રોલ કરી રહ્યા છે. લોકો સવાલ ઉઠાવી રહ્યા છે કે શું લોકપ્રિયતા અને મોટા બજેટની ફિલ્મો માટે યશે પોતાની જૂની મર્યાદાઓ અને સંસ્કારોને નેવે મૂકી દીધા છે?

ગીતુ મોહનદાસ દ્વારા નિર્દેશિત 'ટોક્સિક' એક બિગ બજેટ ફિલ્મ છે જેમાં કિયારા અડવાણી, નયનતારા અને હુમા કુરેશી જેવી દિગ્ગજ અભિનેત્રીઓ જોવા મળવાની છે. 19 માર્ચ, 2026 ના રોજ રિલીઝ થનારી આ ફિલ્મ માટે યશના ચાહકો આતુર હતા, પરંતુ કાનૂની ફરિયાદો અને ટીઝર રદ કરવાની માંગે નિર્માતાઓની ચિંતા વધારી દીધી છે. યશના સમર્થકો દલીલ કરી રહ્યા છે કે આ માત્ર ફિલ્મના પાત્રની જરૂરિયાત છે, જ્યારે વિરોધીઓ તેને ભારતીય સંસ્કૃતિ અને યશની પોતાની છબી વિરુદ્ધ ગણાવી રહ્યા છે. હવે જોવાનું એ રહેશે કે યશ આ વિવાદ પર મૌન તોડે છે કે પછી ફિલ્મમાં કોઈ ફેરફાર કરવામાં આવે છે.