હવામાન વિભાગ (આઈ એમ ડી) એ ઉત્તર ભારતમાં ભીષણ શીત લહેર અને ગાઢ ધુમ્મસને લઈને ચેતવણી જાહેર કરી છે. ૧૫ જાન્યુઆરીની રાતથી એક નવું પશ્ચિમી વિક્ષેપ (વેસ્ટર્ન ડિસ્ટર્બન્સ) સક્રિય થવાની સંભાવના છે.

સમગ્ર ઉત્તર ભારત અત્યારે કાતિલ ઠંડી અને ગાઢ ધુમ્મસના સકંજામાં છે. હવામાન વિભાગના અહેવાલ મુજબ, ૧૪ જાન્યુઆરી, બુધવારના રોજ દિલ્હી-એનસીઆર, પંજાબ, હરિયાણા, પશ્ચિમ ઉત્તર પ્રદેશ અને ઉત્તરાખંડમાં અતિ ગાઢ ધુમ્મસ છવાયેલું રહ્યું હતું, જેના કારણે જનજીવન ખરાબ રીતે પ્રભાવિત થયું છે.

સવારે ઘણા શહેરોમાં વિઝિબિલિટી (દ્રશ્યતા) શૂન્ય મીટર નોંધાઈ હતી. જેમાં અમૃતસર, અંબાલા, પંતનગર અને ઉધમપુરનો સમાવેશ થાય છે. લુધિયાણા અને હિસારમાં દ્રશ્યતા માત્ર ૨૦ મીટરથી પણ ઓછી હતી. 

ગાઢ ધુમ્મસના કારણે સડક, રેલ અને હવાઈ સેવાઓ પર માઠી અસર પડી છે અને અનેક ટ્રેનો તથા ફ્લાઇટ્સ મોડી પડી છે. 

પંજાબ અને હરિયાણામાં 'કોલ્ડ વેવ' થી લઈને 'સિવિયર કોલ્ડ વેવ'ની સ્થિતિ છે. 

જમ્મુ-કાશ્મીર, લદ્દાખ અને હિમાચલ પ્રદેશમાં લઘુત્તમ તાપમાન શૂન્યથી નીચે ચાલ્યું ગયું છે.

હવામાન વિભાગે આગાહી કરી છે કે ૧૫ જાન્યુઆરીની રાતથી એક નવું વેસ્ટર્ન ડિસ્ટર્બન્સ પશ્ચિમી હિમાલય ક્ષેત્રને પ્રભાવિત કરશે. જેના કારણે ૧૬ થી ૧૯ જાન્યુઆરી વચ્ચે પહાડી રાજ્યોમાં હળવોથી મધ્યમ વરસાદ અને બરફવર્ષા થવાની સંભાવના છે. 

૧૮ અને ૧૯ જાન્યુઆરીએ પંજાબ, હરિયાણા, ચંદીગઢ અને પશ્ચિમ ઉત્તર પ્રદેશમાં પણ હળવા વરસાદની શક્યતા છે