મુંબઈ: તા.૧૪: બોલિવૂડ સુપરસ્ટાર ઋત્વિક રોશને તાજેતરમાં તેનો 52મો જન્મદિવસ અત્યંત વૈભવી અને શાંતિપૂર્ણ અંદાજમાં ઉજવ્યો હતો. હંમેશા લાઈમલાઈટમાં રહેવાને બદલે ઋત્વિકે આ ખાસ દિવસને ફૂકેતના અતિ-આલીશાન 'ત્રિસારા રિસોર્ટ'માં તેના પરિવાર અને નજીકના મિત્રો સાથે ખાનગી રીતે માણવાનું પસંદ કર્યું હતું. સોશિયલ મીડિયા પર વાયરલ થયેલી તસવીરોમાં ઋત્વિક તેના પુત્રો હ્રેહાન-હૃધાન, ગર્લફ્રેન્ડ સબા આઝાદ અને ભૂતપૂર્વ પત્ની સુઝૈન ખાન સાથે દરિયાકિનારે મસ્તી કરતો જોવા મળી રહ્યો છે.
'ત્રીજું સ્વર્ગ' એટલે ત્રિસારા રિસોર્ટ
સંસ્કૃત શબ્દ 'ત્રિસારા'નો અર્થ થાય છે 'ત્રીજા સ્વર્ગનો બગીચો'. આ રિસોર્ટ ફૂકેતના પશ્ચિમ કિનારે એકાંત ખાડીમાં આવેલું છે, જ્યાં આંદામાન સમુદ્રનો અદભુત નજારો જોવા મળે છે. સેલિબ્રિટીઓ અહીં ખાસ કરીને એટલે આવે છે કારણ કે અહીં તેમને દુનિયાની નજરોથી દૂર સંપૂર્ણ 'પ્રાઈવસી' મળે છે. ઋત્વિકે અહીં ઓશન વ્યૂ પૂલ વિલામાં રોકાણ કર્યું હતું, જ્યાં દરેક વિલામાં અંગત સ્વિમિંગ પૂલ અને ઉષ્ણકટિબંધીય બગીચાઓની સુવિધા છે.
એક રાતનું ભાડું સાંભળીને આંખો ચકરાઈ જશે!
ઋત્વિકે જ્યાં જન્મદિવસ ઉજવ્યો તે રિસોર્ટ ફૂકેતના સૌથી મોંઘા સ્થળોમાંનું એક છે. અહીં રહેવાનો ખર્ચ સામાન્ય માણસના વર્ષના પગાર જેટલો હોઈ શકે છે. વિગતો મુજબ:
•    જુનિયર સ્યુટ: એક રાતના આશરે ₹૧.૫૫ લાખ.
•    ૧ બેડરૂમ વિલા: આશરે ₹૧.૭૯ લાખ.
•    ૨ બેડરૂમ ઓશનફ્રન્ટ વિલા: એક રાતનું ભાડું ₹૩.૫૩ લાખ સુધી પહોંચે છે.
ઋત્વિક અને તેના મિત્રોએ અહીં અનેક દિવસો વિતાવ્યા હતા, જેનો કુલ ખર્ચ લાખો રૂપિયામાં હોવાનું મનાય છે.
આધુનિક પરિવારની અનોખી મિશાલ
ઋત્વિકના આ બર્થડે વેકેશનમાં સૌથી વધુ ચર્ચા તેના પરિવારની થઈ હતી. તેની સાથે તેની માતા પિંકી રોશન ઉપરાંત ભૂતપૂર્વ પત્ની સુઝૈન ખાન અને તેનો પાર્ટનર અર્સલાન ગોની પણ હાજર હતા. ઋત્વિકે રિસોર્ટ સ્ટાફનો આભાર માનતા આ રજાઓને "શાંતિપૂર્ણ અને અવિસ્મરણીય" ગણાવી હતી. કામની વાત કરીએ તો, ઋત્વિક ટૂંક સમયમાં જ તેની આગામી બ્લોકબસ્ટર ફિલ્મ 'વોર ૨'માં જોવા મળશે.