નવી દિલ્હી: વિશ્વભરમાં આતંકવાદના વધતા જતા જોખમો વચ્ચે ભારત આજે એક મહત્વપૂર્ણ આંતરરાષ્ટ્રીય મંચનું નેતૃત્વ કરી રહ્યું છે. નવી દિલ્હીમાં આજે ભારત અને મલેશિયાની સહ-અધ્યક્ષતામાં 16મી ASEAN સંરક્ષણ પ્રધાનોની બેઠક (ADMM-Plus) અંતર્ગત નિષ્ણાત કાર્યકારી જૂથની બેઠકનો ધમાકેદાર પ્રારંભ થયો છે. આ ત્રણ દિવસીય કાર્યક્રમ દક્ષિણ-પૂર્વ એશિયા અને પ્રશાંત ક્ષેત્રની સુરક્ષા માટે એક નિર્ણાયક વળાંક સાબિત થઈ શકે છે.
18 દેશોનું શક્તિપ્રદર્શન અને સહયોગ
આ બેઠકમાં માત્ર એશિયાના જ નહીં, પણ વિશ્વની મહાસત્તાઓ એક ટેબલ પર આવી છે. જેમાં ૧૧ ASEAN સભ્ય દેશો (બ્રુનેઈ, કંબોડિયા, ઇન્ડોનેશિયા, મલેશિયા, સિંગાપોર વગેરે) અને ૭ મોટા સંવાદ ભાગીદાર દેશો જેવા કે અમેરિકા, રશિયા, ચીન, જાપાન, ઓસ્ટ્રેલિયા, દક્ષિણ કોરિયા અને ન્યુઝીલેન્ડના પ્રતિનિધિમંડળો ભાગ લઈ રહ્યા છે. આટલા વૈવિધ્યસભર અને શક્તિશાળી દેશોનું એકસાથે આવવું એ આતંકવાદ વિરુદ્ધ ભારતની બહુપક્ષીય કૂટનીતિની મોટી જીત માનવામાં આવે છે.
આતંકવાદ: શાંતિ સામેનો સૌથી મોટો પડકાર
ઉદ્ઘાટન સત્રને સંબોધતા સંરક્ષણ મંત્રાલયના સંયુક્ત સચિવ અમિતાભ પ્રસાદે આકરા શબ્દોમાં જણાવ્યું હતું કે, "આતંકવાદ એ વર્તમાન સમયનો સૌથી કપટી સંઘર્ષ છે. આ રાક્ષસ સામે લડવા માટેના આપણા સામૂહિક પ્રયાસો જ ભવિષ્યમાં આ પ્રદેશની શાંતિ અને સમૃદ્ધિ નક્કી કરશે." તેમણે ભાર મૂક્યો હતો કે આતંકવાદ કોઈ સરહદો ઓળખતો નથી, તેથી તેનો સામનો કરવા માટે તમામ દેશોએ એકજૂથ થવું અનિવાર્ય છે.
શું હશે ત્રણ દિવસનો એજન્ડા?
આ બેઠક આગામી ત્રણ વર્ષ માટેની કાર્ય યોજના પર કેન્દ્રિત છે. બે દિવસીય ગહન ચર્ચા દરમિયાન, વિવિધ દેશોના સૈન્ય નિષ્ણાતો નીચે મુજબના મુદ્દાઓ પર મંથન કરશે:
•    ગુપ્તચર માળખું (Intelligence Sharing): આતંકવાદી ગતિવિધિઓની માહિતીની આપ-લે માટે મજબૂત નેટવર્ક બનાવવું.
•    શ્રેષ્ઠ પ્રથાઓ (Best Practices): આતંક વિરોધી કામગીરીમાં સફળ રહેલી વ્યૂહરચનાઓ એકબીજા સાથે શેર કરવી.
•    તાલીમ અને ક્ષમતા નિર્માણ: સભ્ય દેશોના સૈન્ય દળોને આધુનિક શસ્ત્રો અને ટેકનોલોજીથી સજ્જ કરવા.
આ બેઠક દ્વારા ભારત વિશ્વને એ સંદેશ આપી રહ્યું છે કે આતંકવાદને જડમૂળથી ઉખેડવા માટે તે કોઈ પણ પ્રકારની કમી બાકી રાખશે નહીં.