નવી દિલ્હી, તા. 15 જાન્યુઆરી : સુપ્રીમ કોર્ટે ગુરુવારે પશ્ચિમ બંગાળના મુખ્યમંત્રી મમતા બેનર્જી અને રાજ્યના ઉચ્ચ અધિકારીઓને નોટિસ પાઠવી છે. તૃણમૂલ કોંગ્રેસ સાથે જોડાયેલી રાજકીય કન્સલ્ટન્સી ફર્મ I-PAC પર એન્ફોર્સમેન્ટ ડિરેક્ટોરેટ (ED) દ્વારા પાડવામાં આવેલા દરોડા દરમિયાન મુખ્યમંત્રી દ્વારા કથિત હસ્તક્ષેપના મામલે આ નોટિસ જારી કરવામાં આવી છે. જસ્ટિસ પ્રશાંત કુમાર મિશ્રા અને વિપુલ પંચોલીની બેન્ચે પશ્ચિમ બંગાળ પોલીસને ED અને તેના અધિકારીઓ વિરુદ્ધ નોંધાયેલી FIR પર તપાસ કરવાથી પણ રોકી દીધી છે.
EDના ગંભીર આક્ષેપો અને ‘ચોરી’નો ગુનો:
ED વતી હાજર રહેલા સોલિસિટર જનરલ તુષાર મહેતાએ કોર્ટમાં ચોંકાવનારા આક્ષેપો કર્યા હતા. તેમણે જણાવ્યું હતું કે ૮ જાન્યુઆરીએ જ્યારે કોલકાતાના સોલ્ટ લેક સ્થિત I-PAC અને તેના ચીફ પ્રતીક જૈનને ત્યાં દરોડા ચાલુ હતા, ત્યારે મુખ્યમંત્રી મમતા બેનર્જીએ પોલીસ કાફલા સાથે ત્યાં ધસી જઈને કાયદાકીય પ્રક્રિયામાં હસ્તક્ષેપ કર્યો હતો. મહેતાએ આક્ષેપ કર્યો હતો કે મુખ્યમંત્રીએ દરોડાના સ્થળેથી મહત્વના પુરાવાઓ અને ડિજિટલ સાધનો જબરદસ્તીથી હટાવ્યા હતા, જે ‘ચોરી’ના ગુના સમાન છે. વધુમાં, ED અધિકારીનો મોબાઈલ પણ છીનવી લેવામાં આવ્યો હોવાનો દાવો કરાયો હતો.
સુપ્રીમ કોર્ટનો નિર્દેશ:
કોર્ટે મમતા બેનર્જી અને બંગાળ સરકારને બે અઠવાડિયામાં સોગંદનામું દાખલ કરવા જણાવ્યું છે. આ કેસની આગામી સુનાવણી ૩ ફેબ્રુઆરી, ૨૦૨૬ના રોજ નક્કી કરવામાં આવી છે. ત્યાં સુધી કોર્ટે આદેશ આપ્યો છે કે પશ્ચિમ બંગાળ સરકારે I-PAC પરિસર અને તેની આસપાસના તમામ CCTV કેમેરાના ફૂટેજ સુરક્ષિત રાખવા પડશે જેથી પુરાવા સાથે છેડછાડ ન થઈ શકે.
બચાવ પક્ષની દલીલો:
મમતા બેનર્જી વતી હાજર રહેલા વરિષ્ઠ વકીલ કપિલ સિબલે આ આક્ષેપોને પાયાવિહોણા ગણાવ્યા હતા. તેમણે દલીલ કરી હતી કે EDના પોતાના પંચનામા મુજબ કોઈ ડિજિટલ સાધનો લેવામાં આવ્યા નથી અને મમતા બેનર્જી સામેના આક્ષેપો જુઠ્ઠા છે. સિબલે પ્રશ્ન ઉઠાવ્યો હતો કે ચૂંટણીના માહોલમાં ED અચાનક કેમ સક્રિય થઈ છે. બીજી તરફ, રાજ્ય સરકાર વતી અભિષેક મનુ સિંઘવીએ સીધા સુપ્રીમ કોર્ટમાં આવવાની EDની અરજી સામે વાંધો ઉઠાવ્યો હતો.
સમગ્ર વિવાદનું મૂળ:
આ વિવાદ કોલસા કૌભાંડની તપાસ સાથે જોડાયેલો છે. ED મુજબ, I-PAC માં દરોડા દરમિયાન વાંધાજનક સામગ્રી મળી આવી હતી, પરંતુ સ્થાનિક પોલીસ અને મુખ્યમંત્રીના હસ્તક્ષેપને કારણે સર્ચ ઓપરેશન અધવચ્ચે જ બંધ કરવું પડ્યું હતું. સોલિસિટર જનરલે માંગ કરી છે કે આ ઘટનામાં સામેલ પોલીસ અધિકારીઓને તાત્કાલિક સસ્પેન્ડ કરવામાં આવે જેથી ભવિષ્યમાં કોઈ કેન્દ્રીય એજન્સીનું મનોબળ ન તૂટે.