બેંગકોક: થાઇલેન્ડ અત્યારે બાંધકામ ક્ષેત્રે સુરક્ષાની મોટી કટોકટીનો સામનો કરી રહ્યું છે. પાટનગર બેંગકોકની બહાર આવેલા સમુત સખોન પ્રાંતમાં આજે સવારે એક નિર્માણાધીન એક્સપ્રેસવે પર વિશાળ પીળી ક્રેન તૂટી પડતા ભયાનક દુર્ઘટના સર્જાઈ છે. આ ઘટનામાં અત્યાર સુધીમાં ઓછામાં ઓછા બે લોકોના મોતની પુષ્ટિ થઈ છે. ચોંકાવનારી વાત એ છે કે, આ અગાઉના જ દિવસે ઉત્તરપૂર્વ થાઇલેન્ડમાં એક ટ્રેન પર ક્રેન પડવાથી ૩૨ લોકોએ જીવ ગુમાવ્યા હતા.
કાટમાળ નીચે વાહનો કચડાયા, હોટલ પાસે સર્જાયો ભયાનક નજારો
આ દુર્ઘટના ગુરુવારે સવારે ૯:૧૫ વાગ્યે રામા ૨ રોડ પર એક હોટલની બિલકુલ સામે બની હતી. એલિવેટેડ મોટરવેનું નિર્માણ કરી રહેલી ક્રેન અચાનક સંતુલન ગુમાવી બેસતા કોંક્રિટનું ભારે માળખું નીચે ધસી પડ્યું હતું. માળખું પડતાની સાથે જ નીચેથી પસાર થઈ રહેલા બે વાહનો કાટમાળ નીચે કચડાઈ ગયા હતા. ઘટનાના પ્રત્યક્ષદર્શી અને હોટલના સિક્યુરિટી ગાર્ડ શિવાનર્ટ જયસુકુલે જણાવ્યું કે, તેમણે મોટરવેને અડધો ભાગ તૂટતા જોયો અને ભારે અવાજ સાથે ધૂળની ડમરીઓ ઉડી હતી.
સરકાર એક્શન મોડમાં: તમામ બાંધકામો સ્થગિત
સતત બીજા દિવસે સર્જાયેલી આ જીવલેણ ઘટના બાદ થાઇલેન્ડના પરિવહન પ્રધાન ફીપટ રત્ચાકિતપ્રકર્ણે કડક વલણ અપનાવ્યું છે. તેમણે પત્રકારોને જણાવ્યું હતું કે, જ્યાં સુધી સુરક્ષાની સંપૂર્ણ ખાતરી ન થાય ત્યાં સુધી સરકાર જમીનથી ઉપર (Elevated) ચાલી રહેલા તમામ બાંધકામો તાત્કાલિક અસરથી રોકી રહી છે. આ અકસ્માતનું ચોક્કસ કારણ જાણવા માટે તપાસ સમિતિની રચના કરવામાં આવી છે.
ભીડનો સમય ન હોવાથી મોટી હોનારત ટળી
જોકે આ અકસ્માતમાં જાનહાનિ થઈ છે, પરંતુ પ્રત્યક્ષદર્શીઓના મતે જો આ ઘટના પીક અવર્સ (ટ્રાફિકના સમય) દરમિયાન બની હોત, તો મૃત્યુઆંક ખૂબ મોટો હોઈ શકત. બચાવ કામગીરી અત્યારે પણ ચાલુ છે અને કાટમાળ નીચે દબાયેલી કારમાં કોઈ બચી ગયું છે કે કેમ તેની તપાસ કરવામાં આવી રહી છે. સતત વધતી આવી ઘટનાઓએ થાઇલેન્ડમાં ચાલી રહેલા આધુનિક માળખાગત પ્રોજેક્ટ્સની ગુણવત્તા અને સુરક્ષા પર ગંભીર સવાલો ઉભા કર્યા છે.