નવી દિલ્હી : દિલ્હીથી સિંગાપોર જઈ રહેલા એર ઇન્ડિયાના વિમાનમાં ટેકઓફના થોડા જ સમય બાદ ટેકનિકલ ખામી સર્જાતા વિમાનને અધવચ્ચેથી પરત ફેરવવાની ફરજ પડી હતી. ગુરુવારે વહેલી સવારે બનેલી આ ઘટનામાં ૧૯૦ મુસાફરોના જીવ અધ્ધર થઈ ગયા હતા, જ્યારે વિમાનના 'સહાયક પાવર યુનિટ' (APU) માં આગ લાગી હોવાનું એલાર્મ વાગ્યું હતું. જોકે, પાયલોટે સમયસૂચકતા વાપરી વિમાનને સુરક્ષિત રીતે દિલ્હીના આંતરરાષ્ટ્રીય એરપોર્ટ પર ઉતારી લીધું હતું.
હવામાં એક કલાકનો દિલધડક ડ્રામા
સૂત્રોના જણાવ્યા અનુસાર, ફ્લાઇટ AI 2380 એ દિલ્હીથી સિંગાપોર માટે ઉડાન ભરી હતી. ઉડાનના અંદાજે એક કલાક બાદ જ્યારે વિમાન હવામાં હતું, ત્યારે અચાનક ટેકનિકલ સિસ્ટમમાં ખામી દેખાઈ હતી. ફ્લાઇટ ટ્રેકિંગ વેબસાઇટ 'ફ્લાઇટરેડાર24' મુજબ, બોઇંગ ૭૮૭-૯ ડ્રીમલાઇનર વિમાન લગભગ એક કલાક સુધી હવામાં રહ્યું અને ત્યારબાદ પાયલોટે સુરક્ષાના કારણોસર દિલ્હી પરત ફરવાનો નિર્ણય લીધો. વિમાન ગુરુવારે રાત્રે ૧:૦૦ વાગ્યાની આસપાસ દિલ્હી એરપોર્ટ પર સુરક્ષિત લેન્ડ થયું હતું.
મુસાફરો માટે વૈકલ્પિક વ્યવસ્થા
એર ઇન્ડિયાના પ્રવક્તાએ જણાવ્યું હતું કે, શંકાસ્પદ ટેકનિકલ સમસ્યાને કારણે વિમાન પરત લાવવામાં આવ્યું હતું. દિલ્હીમાં ગ્રાઉન્ડ સ્ટાફ દ્વારા મુસાફરોની પૂરતી કાળજી લેવામાં આવી હતી અને તેમને જરૂરી સહાય પૂરી પાડવામાં આવી હતી. આ ૧૯૦ મુસાફરોને સિંગાપોર પહોંચાડવા માટે તાત્કાલિક અન્ય વૈકલ્પિક વિમાનની વ્યવસ્થા કરવામાં આવી હતી, જેના દ્વારા તેઓ પોતાની મુસાફરી પર આગળ વધ્યા હતા.
એરલાઇન્સે વ્યક્ત કર્યો ખેદ
એર ઇન્ડિયાએ આ અણધારી ઘટના અને મુસાફરોને થયેલી માનસિક તેમજ સમયની અસુવિધા બદલ દિલગીરી વ્યક્ત કરી છે. એરલાઇન્સે ભારપૂર્વક જણાવ્યું હતું કે તેમના માટે મુસાફરોની સુરક્ષા સર્વોપરી છે અને કોઈપણ જોખમ ન લેતા વિમાનને પરત લાવવાનો નિર્ણય લેવાયો હતો. હાલમાં આ વિમાનનું ટેકનિકલ નિરીક્ષણ કરવામાં આવી રહ્યું છે જેથી આગની ચેતવણી મળવા પાછળનું સાચું કારણ જાણી શકાય.